Qazaqstanda múgedektigi bar 700 myńnan asa adam turady
ASTANA. KAZINFORM - 2024 jylǵy 1 qazandaǵy jaǵdaı boıynsha Qazaqstanda múgedektigi bar 732,1 myń adam turady. Ol halyqtyń jalpy sanynyń 3,6%-yn quraıdy, olardyń 381,3 myńy eńbekke qabiletti jastar, dep habarlaıdy Eńbek mınıstrligi.
QR Áleýmettik kodeksine sáıkes jergilikti atqarýshy organdar múgedektigi bar adamdar úshin aýyr jumystardaǵy, eńbek jaǵdaılary zııandy, qaýipti jumystardaǵy jumys oryndaryn esepke almaǵanda, jumysshylardyń jalpy sanynyń 2-den 4 %-na deıin (jaldamaly jumyskerlerdiń jalpy sany keminde 50 adam bolǵan kezde) kólemde jumys oryndaryna kvota belgileıdi. Aǵymdaǵy jyldyń toǵyz aıyna kvota sheńberinde múgedektigi bar 5,4 myń adam jumysqa ornalastyryldy.
Sondaı-aq erekshe qajettilikteri bar adamdar jumyspen qamtýǵa járdemdesýdiń belsendi sharalaryna tartylýda. Máselen, aǵymdaǵy jyldyń 1 qazandaǵy jaǵdaı boıynsha turaqty jumysqa 5,9 myń adam, jastar praktıkasyna – 505 adam, áleýmettik jumys oryndaryna – 654 adam, qoǵamdyq jumystarǵa – 5,9 myń adam, «Kúmis jas» jobasy boıynsha – 828 adam, «Alǵashqy jumys orny» jobasy boıynsha – 183 adam, «Urpaqtar kelisimsharty» jobasy boıynsha – 6 adam jumysqa ornalastyryldy.
Qysqa merzimdi kásiptik oqytýmen 272 adam, «Bastaý bıznes» jobasy boıynsha kásipkerlik negizderine oqytýmen 5 myń adam qamtyldy.
Halyqtyń áleýmettik osal toptaryna jatatyn azamattarǵa óz bıznesin ashý úshin 400 AEK-ke deıingi (1,4 mln teńge) mólsherinde memlekettik granttar beriledi. Búgingi tańda 1470 múgedektigi bar adam osyndaı qoldaýǵa ıe boldy.
Sondaı-aq, 2018 jyldan bastap halyqaralyq tájirıbeni eskere otyryp, múgedektigi bar adamdardy jumysqa ornalastyrý úshin arnaıy jumys ornyn jaraqtandyrýǵa baılanysty jumys berýshilerdiń shyǵyndaryn sýbsıdııalaý tártibi engizildi. Aǵymdaǵy jyly osyndaı 71 arnaıy jumys orny quryldy.
