Qazaqstanda mobıldi aýdarymdardy tekserý bastaldy
ASTANA. KAZINFORM — Buǵan deıin salyq komıtetindegiler eskertý jasap kelse, endi revızııaǵa shyndap kiristi. Qazir qańtar, aqpan jáne naýryz aıynyń aýdarymdary boıynsha bank esep ótkizip jatyr.
Bul protsess 15 sáýirge deıin jalǵasady. Azamattardyń shotyna túsken árbir teńge týraly málimetti bankter salyq organyna joldap jatyr. Kirister komıteti jyl basynan beri kásipti zańdastyryp, salyq esebin tapsyrýǵa úndep kelgen. Erejege sáıkes, jalpy somasy 1 mln teńgeden asatyn jáne 3 aı qatarynan 100-den astam aýdarym qabyldaǵan azamattar tekserýge alynady. Endi bankter bergen málimetterdiń nátıjesinde eskertýdi elemegenderge habarlama jiberiledi. Biraq birden aıyppul salynbaıdy. 30 kúnniń ishinde qarjynyń qaıdan kelgenin túsindirýińiz kerek. Qarajattyń bızneske qatysy joq ekeni dáleldense, baqylaýdan bosatylady. Al eskertýdi elemegender shotyna túsken qarjynyń 10 paıyzyn salyq retinde tóleýge mindetti.
— Bızneste taýarlardy satý, qyzmet kórsetý kezinde aqysyn alar kezde mindetti túrde bıznes shotqa aýdarylý kerek. Jeke tulǵanyń jeke shotyn paıdalanýǵa tyıym salynady. Sondyqtan, bul jerde jeke tulǵanyń mobıldi aýdarymyn tekserýdiń negizgi maqsaty kásipkerlik maqsatta paıdalanatyndardy anyqtaý, ıaǵnı, kóptegen adamnan júıeli túrde qabyldasa ol jerde kásipkerlik nyshany bar degen sóz, — dedi QR QM KK Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýuly.
Bul bir rettik tekserý emes. Endi Kirister komıteti ár 3 aı saıyn azamattardyń bank shottaryna osyndaı revızııa júrgizip otyrady. Sondyqtan resmı tabysyńyzdan bólek aqsha taýyp júrseńiz, bárin zańdastyryp alyńyz. Jeke kásipker retinde tirkelip, esep-qısabyńyzdy resmı jarııalaýǵa daǵdylańyz. Áıtpese, tabysyńyz aıyppulǵa ulasyp, eńbegińiz esh ketýi múmkin. Salyqshylar 2024 pen 2025 jyldardaǵy aýdarymdarǵa da tekserý jasaıdy.
— Qazir ár salyq organynda kimde qansha aýdarym bolǵany, ıaǵnı, kásipkerlik belgisi bar aýdarymdar týraly aqparat bar. Biraq olar aqparattardy 2026 jyly jibere salmaýy múmkin. Sebebi, salyq kezeńi degen bar. Ol — 3 jyl. ıAǵnı, 2025 jyl úshin maǵan habarlama 2026,2027,2028 jyly kelýi múmkin. 2028 jyldyń jeltoqsanynda 2025 jyldyń habarlamasy kelse, ol tańqalatyn nárse emes. Sebebi salyqtyq tekserý úsh jyldan turady, — dedi Salyq sarapshysy Baljan Baqytqalıqyzy.
Qazirdiń ózinde arnaıy salyq rejımine ótip, kásibin dóńgeletip otyrǵan azamattar az emes. Biraq revızııa da óz nátıjesin berip otyr. Máselen, búgin Úkimettiń bergen esebinde jyl basynan beri ózin-ózi jumyspen qamtyǵandar úshin arnaıy salyq rejımi boıynsha 392 myń jeke tulǵa tirkelipti. Sóıtip, qosymsha qun salyǵyn tóleýshiler sany 10 myń sýbektige artqan.
Budan buryn mobıldi aýdarymdar týraly alǵashqy derekter sáýir aıynda beriletinin jazǵanbyz.