Qazaqstanda memlekettik qyzmetshilerdiń sany qysqarýy múmkin

ASTANA. KAZINFORM – Jasandy ıntellekt keı mamandardyń ornyn almastyrýy múmkin. Sarapshylar olardyń ishinde memlekettik qyzmetshilerdiń de baryn aıtady. 

– Meniń oıymsha, jasandy ıntellekt engizilgennen keıin memlekettik qyzmetshilerdiń sanyn qysqartý máselesi de kóterilýi múmkin. Sebebi birqatar fýnktsııany endi jasandy ıntellekt atqara alady. Ol – kómekshi qural. Eń bastysy, onymen durys jumys isteı bilý kerek, - deıdi L. N. Gýmılev atyndaǵy EUÝ doktoranty Rústem Bektrýmov Kazinform tilshisine bergen suhbatynda. 

Alaıda etnomedıator bul tehnologııanyń adamdy tolyq almastyra almaıtynyn aıtady.

– Keıbireýler jasandy ıntellekt jýrnalısterdi, sýretshilerdi, mýzykanttar men dızaınerlerdi almastyrady dep qorqady. Biraq bul múmkin emes. Sebebi olar sezimdi, shyǵarmashylyq kúıdi, adamnyń jan dúnıesin shynaıy sýrettep bere almaıdy. Óıtkeni jasandy ıntellektide jan joq. Ol shyǵarmashylyq salada tek kómekshi qural bola alady, - deıdi sarapshy. 

Maman jumysyn JI almastyrýy múmkin qyzmetkerler týraly da pikir bildirdi.

– Másele jasandy ıntellektiniń bireýdiń ornyn basýynda emes. Eń bastysy, kez kelgen memlekettik qyzmetker eńbek naryǵynda básekege qabiletti bolýy kerek. Ol úshin ár adam únemi óz bilimin jetildirip, kásibı deńgeıin kóterip otyrýy qajet. Tek sol kezde ǵana óz ornyn saqtap qalady nemese basqa salada jumys taba alady. Iá, memlekettik organdarda úlken shtattar bar. Olardyń ishinde keıbir mamandar jetkilikti dárejede bilikti bolmaýy múmkin. Mundaı jaǵdaılarda kadrlar aýysyp otyrady. Biraq adam óz-ózimen jumys istese, bilimin jetildirse, esh qıyndyq bolmaıdy, - dedi ol. 

Aıta keteıik, Ózbekstan úkimeti JI-di engize otyryp, 2 myńnan astam sheneýnikti jumystan bosatpaq.