Qazaqstanda memlekettik arhıv qyzmetteriniń aqyly túrin kóbeıtý usynyldy
Parlament Májilisiniń otyrysynda QR Mádenıet jáne sport mınıstri Arystanbek Muhamedıuly arhıv isteri jóninde 4 zańǵa ózgerister men tolyqtyrýlar engizý kózdelgenin atap ótti. Onyń aıtýynsha, zań jobasynyń negizgi maqsaty - qujattamalyq qamtamasyz etýdiń jańa aqparattyq nysandaryn ómirdiń barlyq salalaryna yqpaldastyrý men elektrondyq qujat aınalymyna kóshýge baılanysty arhıv isi salasyndaǵy zańnamany jetildirý.
Mınıstr qoldanystaǵy ekonomıkalyq jáne ákimshilik reformalar jaǵdaıynda arhıv isin retteýdiń múldem jańa quraldary paıda bolyp, osynyń nátıjesinde qoldanystaǵy zańnamanyń keıbir tustary zamanaýı talaptarǵa sáıkes kelmeıtinin aıtady.
«Birinshiden, arhıvtik qujat, arhıv isi sekildi túsinikter saralanyp jatyr. Ulttyq arhıv qoryna qujattardyń memlekettik esebi, Ulttyq arhıv qorynyń qujaty, basqarýdy qujattyq turǵyda qamtamasyz etý, erekshe qundy qujat sekildi uǵymdar aınalymǵa engizilgeli otyr. Ekinshiden, memlekettik arhıv júıesine Tuńǵysh Prezıdent- Elbasy kitaphanasyn qosýdy usynamyz», - deıdi ol.
Mınıstr sonymen birge, memlekettik arhıv kórsetetin qyzmettiń tizimin, atap aıtqanda aqyly qyzmetti keńeıtý josparlanyp otyrǵanyn aıtyp ótti. Aqyly qyzmetterdiń qataryna taqyryptyq, genealogııalyq suraýlar, arhıv qujattarynyń depozıtarlyq saqtalýy jatady.
«Ótken jyly «EKSPO-2017» mamandandyrylǵan halyqaralyq kórmesi aıasynda Astanada sırek kitaptar men qoljazbalardyń Ulttyq ortalyǵy ashylǵan bolatyn. Biz bul turǵyda Armenııadaǵy ǵylymı-zertteý ortalyqtarynyń tabysty tájirıbesin negizge aldyq. Qysqa ýaqyttyń ishinde Ortalyqta memlekettiń tarıhy men mádenıetine asa qundy tarıhı kitaptar men qoljazbalardyń kollektsııasy qalyptasyp úlgerdi. Zertteýshiler úshin kórme men oqý zaldary ashyldy. Ortalyqqa otandastarymyzben birge, sheteldikterdiń (BAÁ, Iran, Frantsııa, Polsha, Shvetsııa) de qyzyǵýshylyqtary erekshe boldy», - deıdi Arystanbek Muhamedıuly.
