Qazaqstanda majar tili oqytylady
ASTANA. KAZINFORM — Elordada majar tilin oqytý oryndaryn ashý týraly qujattarǵa qol qoıyldy. Bul týraly QR Premer-mınıstriniń orynbasary — Syrtqy ister mınıstri Murat Nurtileý málim etti.
Búgin Majarstannyń Syrtqy ekonomıkalyq baılanystar jáne syrtqy ister mınıstri Peter Sıııarto elordaǵa resmı saparmen keldi.
Mártebeli meımandy Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileý qarsy aldy.
— Qazaq-majar qarym-qatynasy tek tsıfrlar men kelisimderden ǵana turmaıdy, onyń qundy rýhanı negizi mádenı-gýmanıtarlyq baılanysta jatyr. Qazir 1 myńǵa jýyq qazaqstandyq stýdent Majarstanda bilim alyp jatyr jáne jyl saıyn 250 grant bóledi. Osy oraıda Majarstan Úkimetine alǵys bildiremiz. Búgin dıplomatııalyq akademııalar jáne majar tilin oqytý oryndaryn ashý týraly qujattarǵa qol qoıylýy áriptestigimizdi keńeıtýdegi eleýli qadam, — dedi Murat Nurtileý resmı kezdesýden keıin BAQ ókilderi aldynda málimdeme jasaı turyp.
Odan bólek, kezdesý barysynda Qazaqstan ıadrolyq fızıka ınstıtýty men Býdapeshttegi energetıkalyq zertteýler ortalyǵymen baılanysty quptap, ǵylym salasynda mańyzdy jobalardy qolǵa alýǵa kelisti.
— Baýyrlas halqymyz ben bıznestiń damýyna mamyr aıynda ashylatyn Shymkent-Býdapesht tikeleı áýe reısi súbeli úles qosatynyna kámil senemin, — deıdi mınıstr.
Eske sala ketsek, bıyl 17 qańtarda Qasym-Jomart Toqaev pen Majarstan Premer-mınıstri Vıktor Orban ekijaqty kún tártibiniń ózekti máselelerin talqylap, Qazaqstan men Majarstan arasyndaǵy strategııalyq seriktestikke oń baǵa berdi.