Qazaqstanda majar bankteriniń fılıaly ashylady
ASTANA. KAZINFORM – Byltyr Qazaqstan men Majarstan arasyndaǵy taýar aınalymy 4,4% artyp, 200 mln dollardan asty. Eki el arasyndaǵy ekonomıkalyq baılanys týraly QR Premer-mınıstriniń orynbasary – Syrtqy ister mınıstri Murat Nurtileý málimdedi.
- Peter Sıııarto myrzamen naqty ári nátıjeli kelissózder ótkizip, birqatar ýaǵdalastyqqa qol jetkizdik. Sonyń ishinde, ekijaqty saýda kólemin ulǵaıtýǵa jáne ınvestıtsııalyq kooperatsııany damytýǵa asa mán berildi. Byltyr taýar aınalymy 4,4% artyp, 200 mln dollardan asty. Keleshekte bul kórsetkishti 1 mlrd dollarǵa jetkizý josparda bar. 20 jylda elimizdiń ekonomıkasyna Majarstannan 370 mln dollardan astam tikeleı ınvestıtsııa tartyldy, - dedi Murat Nurtileý BAQ ókilderiniń aldynda málimdeme jasaı otyryp.
Mınıstrdiń málimdeýinshe, qazir elimizde 700 mln dollardy quraıtyn 16 ortaq joba júzege asyrylyp jatyr.
- Búginde majarlyq «MOL» munaı-gaz kompanııasy 200 mln dollar ınvestıtsııa salyp, Batys Qazaqstanda iri gaz kondensaty ken ornyn ıgerýde. «Globalia» kásiporny kún energııasynyń úsh stantsııasyn, al «UBM» holdıngi Almatyda, Qaraǵandy jáne Qostanaı oblystarynda jem shyǵaratyn úsh zaýytty iske qospaq. Osy jetistiktermen toqtap qalmaı, yntymaqtastyqty odan ári ekpindi túrde jalǵastyrý úshin magıstraldy jańa baǵyttardy da aıqyndadyq. Atap aıtqanda, Qazaqstanda majar bankteriniń fılıaldaryn ashý, Býdapeshtte mýltımodaldy termınal salý, Majarstanǵa eksporttalatyn munaı jáne munaı ónimderin ulǵaıtý, sondaı-aq ýran jáne sırek kezdesetin mıneraldardy ıgerý perspektıvasyna senimim mol, - dedi ol.
Onyń aıtýynsha, eki eldiń strategııalyq seriktestigi – Shyǵys pen Batysty jalǵap, saýda men ınvestıtsııanyń jańa kókjıekterin ashatyn altyn kópir.
Aıta keteıik, búgin Majarstannyń Syrtqy ekonomıkalyq baılanystar jáne syrtqy ister mınıstri Peter Sıııarto elordaǵa resmı saparmen keldi.
Belgili bolǵandaı Majarstannyń prezıdenti Tamash Shýıok jáne Parlament spıkeri Laslo Keverdiń Qazaqstanǵa resmı saparpen keledi.
Odan bólek, QR Premer-mınıstriniń orynbasary — Syrtqy ister mınıstri Murat Nurtileý Taıaý Shyǵystaǵy jaǵdaıǵa alańdaýshylyq tanytty.
Sondaı- aq Murat Nurtileý Reseı men Ýkraına arasyndaǵy qaqtyǵystyń ońaılyqpen sheshilmeıtinin aıtty.