Qazaqstanda maınıngpen aınalysatyndar qalaı jumys isteıdi
ALMATY. KAZINFORM – Qazaqstanda maınerler ınfraqurylymy men múmkindikterine qaraı lıtsenzııanyń eki túrin alady. Birinshi túri – tıisti ınfraqurylymǵa, ıaǵnı derekterdi óńdeý ortalyqtaryna ıelik etetin tsıfrlyq maınerler qyzmeti. Ekinshisi – derekter ortalyqtarynda uıashyqtardy jalǵa alatyn jáne energııa kvotasyn talap etpeıtin jabdyq ıeleri bolyp sanalatyn tsıfrlyq maınerler qyzmeti.
QR Ulttyq blokcheın qaýymdastyǵynyń tóraǵasy Dáýren Qarashevtyń aıtýynsha, qazir elde jeke derekterdi óńdeý ortalyǵy bar 50-den astam jáne derekter ortalyqtarynda uıashyqtardy jalǵa alatyn 20-dan astam maınıngpen aınalysatyn kompanııa bar.
– Birinshi lıtsenzııa tek qural-jabdyqtary ǵana emes, qajetti ınfraqurylymy bar, onyń ishinde elektr energııasyn jetkizýshilermen kelisim-sharttary bar kompanııalarǵa beriledi. Ekinshi lıtsenzııa tek apparattyq quraldary bar maınerlerge arnalǵan. Alaıda ekinshi sanattaǵylar óz betinshe jumys isteı almaıdy, óıtkeni zań boıynsha olar tıisti ınfraqurylymy bar birinshi sanattaǵy maınıngpen aınalysatyn kompanııalarǵa tehnıkalaryn ornalastyrýǵa mindetti», - dep túsindirdi Qarashev.
Sarapshy Qazaqstanda salyq pen elektr qýatynyń tapshylyǵy saldarynan «aq maınıng», azaıyp bara jatqanyn atap ótti.
– Qazaqstanda tsıfrlyq maınerdiń ósý dınamıkasy baıqalmaıdy. Qazir olar zańnamalyq júktemege baılanysty tsıfrlyq maınıng naryǵyn tastap jatyr. Olar basqa ıýrısdıktsııaǵa nemese kóleńkege ketedi, – dedi ol.
Onyń aıtýynsha, máseleni sheshý úshin tehnologııany damytyp qana qoımaı, zańnamany sala suranysyna beıimdeý mańyzdy.
- Atap aıtqanda, jabdyq ımportyna qosylǵan qun salyǵyn jáne dástúrli salyqtarmen qatar qoldanylatyn tsıfrlyq maınıng óndirýge salynatyn salyq sııaqty qajetsiz salyqtardy alyp tastalsa, mysaly, qosylǵan qun salyǵy men korporatıvtik tabys salyǵy. Álemniń eshbir ıýrısdıktsııasynda tsıfrlyq maınıngke salyq joq», - dep atap ótti Ulttyq blokcheın qaýymdastyǵynyń tóraǵasy.
Aıta keteıik, Qazaqstanda maınıng óndirý ótken jyldyń sáýir aıynda kúshine engen «Tsıfrlyq aktıvter týraly» zańmen retteledi.