Qazaqstanda kúzgi ań aýlaý maýsymy ashyldy
«Bıyl qustardyń 59 túri men sútqorektilerdiń 34 túrin bekitilgen ańshylyq sharýashylyqtarynyń aýmaqtarynda ǵana aýlaýǵa bolady. Bekitilgen ańshylyq sharýashylyqtarda barlyǵy 2482 qoryqshy jáne 2286 avtomashına bar. Áýesqoılyq (sporttyq) ań aýlaý úshin ańshyda kýálik, janýarlar álemin paıdalanýǵa berilgen ruqsat jáne ańshylyq sharýashylyǵy sýbektisiniń joldamalary bolý tıis. Bunymen birge, ań aýlaǵanda atys qarýyn qoldanar kezde ony saqtaý jáne alyp júrý quqyǵyn beretin QR Іshki ister organdarynyń ruqsaty bolýy qajet. Sondaı-aq, ańshy jyrtqysh qustarmen ań aýlaǵan kezde belgilengen tártippen berilgen tirkeý qujattary bolýy tıis», - delingen QR AShM baspasóz qyzmetiniń málimetinde. Tuıaqty janýarlar men qońyr aıýdy oljalaý qoryqshynyń nemese janýarlar dúnıesin qorǵaý, ósimin molaıtý jáne paıdalaný jónindegi memlekettik ınspektordyń qatysýymen júrgiziledi jáne atyp alǵannan keıin, olar janýarlardyń oljalanǵany týraly belgi jasaıdy. Soǵan qosa, QR AShM Orman sharýashylyǵy jáne janýarlar dúnıesi komıteti ańshylyq aýlaý barysynda órtke qarsy qaýipsizdik sharalaryn qoldaný, ańshylyq alqaptaryn turmystyq jáne kásiptik qaldyqtarmen lastaýǵa jol bermeý qajettigin eske salady.
Aıta keteıik, 2013 jyl boıynsha janýarlar dúnıesin qorǵaý jónindegi zańnama buzýshylyqtarynyń 598 faktisi anyqtaldy, onyń ishinde ákimshilik jaýapkershilikke 561 adam, al qylmystyq jaýapkershilikke 35 zań buzýshy tartyldy. 2014 jyldyń birinshi jartyjyldyǵy boıynsha 259 fakti anyqtaldy, onyń 256-y ákimshilik jaýapkershilikke jáne 9-y qylmystyq jaýapkershilikke tartyldy.