Qazaqstanda kúzgi áskerge shaqyrý naýqany bastaldy

ASTANA. KAZINFORM – Búgin, 28 tamyzda Qazaqstanda resmı túrde kúzgi áskerge shaqyrý naýqany bastaldy. Ol 31 jeltoqsanǵa deıin jalǵasady.

Memleket basshysynyń Jarlyǵyna sáıkes 2 qyrkúıekten bastap elimizdiń barlyq óńirinde qalalyq jáne aýdandyq shaqyrý komıssııalary óz jumysyn bastady. Osy kezeńde 18 ben 27 jas aralyǵyndaǵy shamamen 22 myń jas qazaqstandyq Qarýly kúshter men basqa da áskerı qurylymdardyń qataryna qosylady. Bul týraly Astananyń Qorǵanys isteri jónindegi departamenti basshysynyń orynbasary Ánýar Áýbákirov pen vedomstvo ókili Ǵanı Artyqov elordanyń Kommýnıkatsııalar qyzmetinde ótken brıfıngte málim etti, dep jazdy qala ákimdiginiń resmı saıty.

Shaqyrylýshylar kelesi áskerı qurylymdarǵa bólinedi:

• Qarýly kúshterge – 10 myńnan astam;

• Ulttyq ulanǵa – 7 myńnan astam;

• UQK Shekara qyzmetine – 2 myńnan astam;

• Tótenshe jaǵdaılar mınıstrligine – 300-den astam;

• Memlekettik kúzet qyzmetine – shamamen 300 sarbaz.

Tek Astananyń ózinen bıylǵy kúzgi shaqyrtý naýqany aıasynda 1000-nan astam jas ásker qataryna jiberiledi. Bıyl áskerge shaqyrý rásimi halyq úshin barynsha ashyq ári yńǵaıly formatta uıymdastyrylǵan.

Shaqyrylýshylarǵa jeke shaqyrýlar jáne 1414 biryńǵaı baılanys ortalyǵy arqyly SMS-habarlamalar joldanady. Sonymen qatar Qorǵanys isteri jónindegi departamentterdiń elektrondy poshtasy men áleýmettik jelilerdegi resmı paraqshalary arqyly azamattar qajetti aqparatty jyldam ári ashyq ala alady. Astananyń Qorǵanys isteri jónindegi departamentiniń ókili, polkovnık Ǵanı Artyqovtyń aıtýynsha, mundaı sharalar halyqpen tıimdi qarym-qatynas ornatýǵa múmkindik beredi.

Departament basshysynyń orynbasary, polkovnık Ánýar Áýbákirov merzimdi áskerı qyzmettiń artyqshylyqtary men sońǵy jyldary engizilgen jańashyldyqtarǵa toqtaldy. Negizgi sharalar qatarynda:

• Nesıe kanıkýly: 17 myńnan astam merzimdi áskerı qyzmetshiler jalpy somasy 6,6 mlrd teńgeni quraıtyn qaryzdaryn óteýdi keıinge shegerý múmkindigin aldy. Bul áskerde júrgen jastarǵa áleýmettik jáne qarjylyq turǵydan jeńildik jasaıdy.

• Joǵary bilim alý: Qorǵanys mınıstrligi eldiń 80-ge jýyq joǵary oqý ornymen kelisim jasap, adal qyzmetin atqarǵan merzimdi sarbazdarǵa 3000 tegin bilim grantyn bóldi. Úzdik áskerı qyzmetshiler oqý aqysyn tólemeı-aq ýnıversıtetke túse alady.

• Tsıfrlandyrý: Áskerı esepke alý tolyqtaı elektrondy formatqa kóshirildi. Azamattar endi www.egov.kz portaly arqyly áskerge shaqyrýdan bosatý nemese keıinge qaldyrý qyzmetterin qaǵaz qujatsyz rásimdeı alady.

– Áskerı qyzmet – bul tek mindet qana emes, azamattyq borysh. Merzimdi áskerı qyzmetten zańsyz jaltarǵandar úshin zańnamada qylmystyq jáne ákimshilik jaýapkershilik kózdelgen, - delingen habarlamada.

Aıta keteıik, Taldyqorǵan qalasy boıynsha 200 azamat merzimdi áskerı qyzmetke shaqyrylady.

Túrkistan oblysynan 2500-ge jýyq azamat kúzgi áskerge attanady.

Shyǵys Qazaqstanda kúzde 800-ge jýyq azamat ásker qataryna shaqyrylady.