Qazaqstanda kitap shyǵarý salasynda jańa ereje qabyldanady

ASTANA. KAZINFORM – QR Mádenıet jáne aqparat mınıstri Aıda Balaeva elimizde kitap shyǵarý salasyn damytý boıynsha qabyldanyp jatqan sharalarǵa qatysty túsinik berdi.

«Kitap – adamzat úshin eń qundy qazyna. Mádenıet jáne aqparat mınıstrligi kitap shyǵarý jumysyn kúsheıtýdi qolǵa alyp otyr. Bul rette, osy saladaǵy tyń bastamalarmen tanystyrýdy jón kórdim. Birinshiden, kitap basý isi úlken jaýapkershilikti talap etedi. Sondyqtan bul salany damytý úshin jańa ereje qabyldanady. Soǵan sáıkes kitaptar birneshe saraptamalyq satydan ótip, tek úzdikteri ǵana jaryq kóredi», - dedi A. Balaeva áleýmettik paraqshasynda jarııalaǵan beıne úndeýinde.

Onyń aıtýynsha, ótinimder jylyna eki ret qabyldanyp, túsken qujattardy tekserý 10 kún alady. Qoǵamdyq talqylaýǵa 15 kún, arnaıy qurylǵan táýelsiz komıssııaǵa 15 kún, sarapshylardyń qorytyndysyn daıyndaýǵa eki aı beriledi.

«Árıne, osy ýaqyt ishinde oqyrmandardyń pikirinen bólek, otandyq ǵylymı-zertteý ortalyqtarynyń áleýmettik zertteýleri, kitap dúkenderiniń satylymǵa qatysty statıstıkalyq málimetteri, baspalardyń basylym reıtıng-tizbesi nazarǵa alynady. Osydan keıin ǵana ókiletti organ naqty sheshim qabyldaıdy», - dedi mınıstr.

Ekinshiden, eger buryn qoljazbaǵa gonorar tólense, endi onyń ornyna jańa ádebı týyndylarǵa grant berilmek. ıAǵnı, bıyldan bastap qalamgerlerdiń bir paraq jańa týyndysyna 6 eń tómengi jalaqy mólsherinde grant tólenedi. Máselen, ortasha eseppen alǵanda, 160 bettik kitapqa 4 mln teńgeden astam qalamaqy beriledi. Grant mınıstrliktiń janynan qurylǵan saraptamalyq komıssııanyń sheshimimen bekitiledi. Al kitapty basyp shyǵarý jáne satylymǵa shyǵarý quqyǵy avtordyń ózinde bolady. Eger ol kitap bir jyl ishinde jaryqqa shyǵyp, kitap dúkenderi arqyly satylymda jaqsy kórsetkishter bolsa, onyń kezekti basylymy men taralymyn memleket óz moınyna alady.

Úshinshiden, aýdarma ádebıeti boıynsha «Mádenıet týraly» Zańyna birqatar ózgeris engizilmek. Memlekettik tapsyryspen basylyp shyǵatyn ádebıetterdiń elektrondy nusqasy Ulttyq elektrondy kitaphanada jarııalanady. Bul óz kezeginde elektrondy nusqalaryn jarııalaýdaǵy avtorlyq quqyqtyq shekteýlerge sáıkes, álemdik tanymal týyndylardy basyp shyǵarýǵa múmkindik bermeı otyr. Kitap basyp shyǵarýǵa beriletin ótinimder aıasyn keńeıtý maqsatynda bul tarmaqshany tolyǵymen alyp tastaý usynyldy.

Tórtinshiden, bestsellerge aınalǵan álemdik ádebıettiń klassıkalyq ári zamanaýı týyndylaryn qazaq tiline aýdarý qazir jeke baspalar arqyly rettelip jatyr. Endi baspagerler avtorlyq quqyǵyn alyp, qazaq tiline aýdarǵan belgili sheteldik týyndylardy memlekettik tapsyryspen basyp shyǵara alady.

Besinshiden, jańa erejede saraptama komıssııasynyń ádebıetterdi oqyp, qorytyndy pikir jazý ýaqyty eki aıǵa qysqarǵandyqtan, jumystyń kúrdeliligine qaraı ótemaqy kólemin eki esege ulǵaıtý qarastyrylmaq.

Altynshydan, «Mádenıet týraly» Zańda jazýshynyń mártebesin aıqyndaý usynyldy. Bul zańnyń tolyq jumys isteýine septigin tıgizedi.