Qazaqstanda kimder bortserik bola alady
ASTANA. KAZINFORM – Búgin – Halyqaralyq bortserikter kúni. Elimizde atalǵan qyzmetkerlerge qandaı talaptar qoıylady? Olarǵa nendeı jeńildikter qarastyrylǵan? Jibek Joly arnasynyń «Búgin LIVE» baǵdarlamasyna qonaq bolǵan bortserik Gúlmıra Ismatýllaeva osy jáne ózge de suraqtarǵa jaýap berdi.
– Bala kezimnen bortserik bolýdy armandadym. Ol kezde 7 jasta edim. Óse kele armandarym aýysty. Biraq osydan eki jyl buryn osy qyzyǵýshylyǵym qaıta ashyldy. Kóp saıahattaǵan soń bortserikterdi de jıi kóre bastadym ba, áıteýir, osy nárse maǵan erekshe áser etti. Bul salaǵa jaqynda ǵana keldim. Búginge deıin jumys barysymen tek úsh memleketke ushyp úlgerdim. Men shetel fılologııasyn aǵylshyn tili boıynsha bitirdim. Bortserik bolý úshin arnaıy mamandyqty támamdaýdyń qajeti shamaly. Oǵan naqty bir dıplomnyń da keregi joq, - deıdi stýdııa qonaǵy.
Gúlmıra Ismatýllaeva bortserik bolý úshin qandaı talaptar qoıylatynyn aıtyp berdi.
– Aldymen arnaıy irikteýden ótemiz. Onda óte kóp úmitker bolady. Basty talap – 18 jastan asqan Qazaqstan Respýblıkasynyń azamaty bolý. Odan bólek, qazaq, orys jáne aǵylshyn tilderinde erkin sóıleı alýyń kerek. Ózge talaptar ár kompanııada ártúrli. Bizdiń kompanııamyzda bortseriktiń boıy 165 santımetrden joǵary bolýy qajet. Sonymen qatar mindetti túrde densaýlyǵyńyz jaqsy bolýy tıis. Biz medıtsınalyq tekserýden ótemiz. Ol kezde densaýlyǵymyz tolyqtaı tekseriledi. Bortserikterdi daıyndaǵanda medıtsınalyq kómek kórsetý sharalaryn da mindetti túrde úıretedi. Sondyqtan olar alǵashqy kómekti qalaı kórsetý kerektigin biledi. Biraq búginge deıin meniń reısimde mundaı jaǵdaı bolǵan emes, - deıdi ol.
Maman bortserik bolýdyń eń qıyn tusy turaqsyz jumys kestesi ekenin jetkizdi.
– Jumys kestemiz ártúrli. Mysaly, 7 kún bolsa, onyń tek 2 kúninde jumysqa shyǵyp, qalǵan 5 kúninde demalamyz. Keıde kerisinshe, 5 kún jumys istep, 2 kún tynyǵamyz. Bizdiń mamandyǵymyzdyń eń qıyn tusy da osy jumys kestesi dep oılaımyn. Keıde túnde, tańda reıster bolady. Keı kezde jolaýshylar sharshap keledi. Sonyń áserinen bizdi de sharshatady. Ondaı kezde jolaýshylarmen daýlaspaımyz. Bortserikter sabyrly bolýy kerek, - deıdi Gúlmıra Ismatýllaeva.
Stýdııa qonaǵy jumystan bólek jeke ómirine de jetkilikti ýaqyt bóletinin jasyrmady.
– Bortserikterdiń jeke ómirine de ýaqyt tabylady. Kestemiz qıyn bolǵanymen, qanshalyqty kóp jumys istesek, sonshalyqty kóp demalamyz. Keńsedegi qyzmetkerler kúnde bir adamdardy kóredi. Al bizdiń jumysymyzda áýede neshe túrli adamdardy kezdestiresiń. Bir reısimiz ekinshi reıske uqsamaıdy. Tipti áriptesterimiz de ár reıs saıyn ózgerip turady, - deıdi ol.
Gúlmıra Ismatýllaeva bortserik bolýdyń eń basty artyqshylyqtaryna da toqtaldy.
– Shetelderge ushyp barǵan kezde sol elde saıahattaısyzdar ma dep kóp adam suraıdy. Bul – ushý ýaqytynyń uzaqtyǵyna baılanysty. Mysaly, Taılandqa 9–10 saǵat ushyp barsa, bortserikter onda mindetti túrde qalyp, demalyp, kelesi reıste qaıtadan ushady. Oǵan qosa, áýe kompanııasynyń jumysshylary 90% jeńildikpen usha alady. Ol úshin bılet ózimiz jumys isteıtin áýe kompanııadan alynýy kerek. Odan bólek, otbasymyzdaǵy adamdar da osy múmkindikti paıdalana alady, - deıdi maman.
Aıta keteıik, buǵan deıin Qazaqstan men Ózbekstan arasynda tikeleı áýe reısi iske qosylǵanyn habarlaǵan edik.