Qazaqstanda qaıtys bolǵan donor 4 adamnyń ómirin saqtap qaldy
ÓSKEMEN. KAZINFORM - Shyǵys Qazaqstan oblystyq aýrýhanasynda qaıtys bolǵan donordan tórt patsıentke aǵzalardy sátti transplantattaý júrgizildi.
QR Densaýlyq saqtaý mınıstrliginiń málimetinshe, mıdyń ólimi týraly málimdemeden keıin 39 jastaǵy donordyń týystary kelisim berip, aǵzalardy tórt adamǵa syıǵa tartty. Kóp aǵzany alý barysynda júrek, ókpe jáne eki búırek alyndy.
1977 jyly týǵan er adamǵa júrek, 1962 jyly týǵan áıelge ókpe, 2015 jyly týǵan balaǵa búırek, al 1966 jyly týǵan áıelge ekinshi búırek transplantattaldy, osylaısha eldiń tórt azamatynyń ómiri saqtalyp qaldy.
Patsıentter Densaýlyq saqtaý mınıstrliginiń Transplantattaýdy úılestirý jónindegi respýblıkalyq ortalyǵynyń respýblıkalyq, óńirlik jáne statsıonarlyq transplantattaý úılestirýshileriniń jáne «University Medical Center» KQ, «Ulttyq ǵylymı onkologııa ortalyǵy» JShS transplantattaý ortalyqtary mamandarynyń úılesimdi komandasynyń arqasynda «ekinshi ómirge» múmkindik aldy.
TÚJMQRO derekteri boıynsha 2023 jyly Qazaqstanda qaıtys bolǵan 7 donor tirkeldi, bul 19 aǵzany transplantattaýǵa múmkindik berdi. 2024 jylǵy 25 qazanda qaıtys bolǵan donorlardyń sany 6-ny qurady, bul 23 aǵzany transplantattaýǵa múmkindik berdi.
2024 jylǵy qazan aıyna Densaýlyq saqtaý mınıstrliginiń Transplanttaýdy úılestirý jáne joǵary tehnologııalyq medıtsınalyq qyzmetter jónindegi respýblıkalyq ortalyǵynyń kútý paraǵynda búırek, baýyr, júrek jáne «júrek-ókpe» keshenine transplantattaýdy qajet etetin 4 080 patsıent bar.
Álemdik tájirıbe rastaǵandaı, qaıtys bolǵannan keıingi donorlyq transplantologııany damytýdyń eń perspektıvaly ádisi sanalady. Ókpeni nemese júrekti kútetin patsıentter úshin bul ómirin saqtap qalýdyń jalǵyz múmkindigi ekenin aıta ketken jón.
