Qazaqstanda kásiptik bilim berýdi reformalaý boıynsha keshendi jospar ázirlenedi
ASTANA. KAZINFORM — Ýnıversıtetterde oqýyn jalǵastyryp jatqan kolledj túlekterine arnalǵan granttar sanyn ulǵaıta otyryp, memlekettik tapsyrys qurylymyn qaıta qaraý kerek. Bul týraly Úkimet otyrysynda Premer-Mınıstr Oljas Bektenov málim etti.
«Kolledj túlekteri eńbek naryǵynda suranysqa ıe bolyp, laıyqty jalaqy alýǵa tıis. Bizdiń birlesken jumysymyzdaǵy eń basty maqsat – osy. Soǵan baılanysty mynadaı tapsyrmalar beremin. Birinshiden, Oqý-aǵartý mınıstrligi múddeli memlekettik organdarmen, ákimdiktermen, «Atameken» palatasymen birlesip, aldaǵy Jumysshy mamandyqtarynyń jyly aıasynda Tehnıkalyq jáne kásiptik bilim berýdi reformalaý boıynsha keshendi jospar ázirlesin. Ol kolledjderdi tehnıkalyq jaǵynan qamtamasyz etý, oqytýshylar quramy men oqý baǵdarlamalaryna qoıylatyn talaptar, kolledjderdiń jumys sapasyn baǵalaý jáne olardy qarjylandyrý baǵytynda naqty sharalardy qamtýǵa tıis. Ekinshiden, Eńbek mınıstrligi men «Atameken» palatasyna salalyq memlekettik organdarmen birlesip, tıisti eýropalyq jikteýish negizinde Tsıfrlyq daǵdylar bankin qalyptastyrýdy qamtamasyz etsin», - dedi O. Bektenov.
Onyń paıymynsha, Ulttyq biliktilik júıesiniń tsıfrlyq platformasy negizinde túlekterdiń jumysqa ornalasýyna járdemdesý úshin sertıfıkattalǵan kolledj túlekteriniń tizilimin qurý qajet. Budan basqa, belgilengen úlgidegi qujattardy bere otyryp, jumysshy biliktiligin taný ortalyqtarynyń jelisin damytý kerek.
«Ǵylym jáne Oqý-aǵartý mınıstrlikteri uqsas mamandyqtar boıynsha ýnıversıtetterde oqýyn jalǵastyryp jatqan kolledj túlekterine arnalǵan granttar sanyn ulǵaıta otyryp, memlekettik tapsyrys qurylymyn qaıta qaraýǵa tıis. Bizdiń aldymyzda jumysshy mamandyqtarynyń mártebesin arttyrý jáne kásiptik-tehnıkalyq bilim berý júıesin damytý boıynsha aýqymdy jumys tur. Bul elimizdiń básekege qabiletti ekonomıkasy men dáıekti damýyn qamtamasyz etý úshin qajet», - dedi Úkimet basshysy.
