Qazaqstanda kásipker áıelder kóbeıip keledi
Jıynǵa qatysqan Ulttyq ekonomıka vıtse-mınıstri Baýyrjan Omarbekovtyń sózine qaraǵanda, memleket áıelder kásipkerligin damytý jáne qoldaý úshin aıtarlyqtaı kúsh-jiger jumsap otyrǵanyn atap ótti. Bul shaǵyn jáne orta bıznestegi áıelder úlesiniń artýymen rastalady (2010 j. – 26%, 2021 j. – 43,3%).
«Ekonomıkalyq belsendilikti qoldaý maqsatynda Kásipkerlikti damytýǵa baǵyttalǵan Ulttyq joba sheńberinde qarjylyq jáne qarjylyq emes qoldaý sharalary usynylady. Sonymen qatar, memlekettik qoldaý halyqaralyq qarjy ınstıtýttarynyń jáne «Damý» KDQ» AQ-nyń túrli baǵdarlamalary arqyly júzege asyrylady», - dep habarlady ol.
2021 jyly syıaqy mólsherlemesin sýbsıdııalaý quraly boıynsha kásipker áıelderdiń shamamen 10 myń jobasy qoldaý tapty, kredıtterge kepildik berý quraly boıynsha 7 myń joba qoldaý tapty. Ótken jyly aqparattyq-qamtamasyz etý boıynsha áıelderge 84 myńǵa jýyq konsýltatsııa, al servıstik qoldaý boıynsha 17 myńnan astam konsýltatsııa kórsetildi.
Sondaı-aq búginde áıelder kásipkerligin damytýdyń 17 ortalyǵy jumys isteıdi. Maqsaty - áıelderdiń ekonomıkalyq belsendiligin yntalandyrý. Kelesi jyly jańadan qurylǵan óńirlerde ortalyqtar ashý josparlanýda (Abaı, Ulytaý, Jetisý).
«Búgingi kúnge deıin ortalyqtarda 7 myńnan astam áıelge qyzmet kórsetildi. Olardyń 30%-y halyqtyń áleýmettik osal toptaryna jatady», - dep málimdedi vıtse-mınıstr.
QR UEM Eýropalyq Qaıta Qurý jáne damý bankimen birlesip kásiporyndarǵa tehnıkalyq kómek kórsetý, sondaı-aq qarjylyq qoldaý arqyly áıelder kásipkerligin damytýdyń básekege qabilettiligi men áleýetin arttyrýǵa baǵyttalǵan «Bıznestegi áıelder» baǵdarlamasyn iske asyrýda.
Sonymen qatar elimizdiń aımaqtarynda «Bir aýyl – bir ónim» pılottyq jobasy engizildi.
«Biz kásipker áıelderdiń múmkindikterin keńeıtý tutastaı alǵanda eldiń ınklıýzıvti, ómirge qabiletti jáne ornyqty ekonomıkasynyń maqsattaryna qol jetkizýge yqpal etetinine senimdimiz», - dep túıindedi Omarbekov.
