Qazaqstanda qansha qar barysy tirshilik etedi

ASTANA. KAZINFORM – Qazaqstanda qar barysy mekendeıtin jerlerdiń 70% – erekshe qorǵalatyn aýmaqtar. Bul týraly Ekologııa jáne tabıǵı resýrstar mınıstri Erlan Nysanbaev aıtyp berdi.

Elimizde qar barysynyń negizgi tirshilik etý ýchaskelerinde 3,6 mln gektar erekshe qorǵalatyn tabıǵı aýmaqtar quryldy.

Atap aıtqanda, Іle Alataýy, Kólsaı kólderi, Altynemel, Saıram-Ógem, Jońǵar Alataýy, Sharyn, Tarbaǵataı, Qatonqaraǵaı, Qarataý jáne Batys Altaı aýmaqtary bar.

– Barystardy esepke alý jáne zamanaýı monıtorıng júrgizý ádisteri, fototuzaqtar men spýtnıktik telemetrııa belsendi qoldanylady. 11 barys spýtnıktik arnaıy moıyn qarǵysymen tańbalandy, aldaǵy ýaqytta erekshe qorǵalatyn tabıǵı aýmaqtar jelisin jetildirý josparlanyp otyr, – dedi mınıstr Úkimet úıinde ótken baspasóz máslıhatynda.

Ótken ǵasyrda 80-jyldardyń basynda Qazaqstandaǵy barystar sany 180-200 dep belgilense, 90-shy jyldary 80-100 basqa deıin azaıǵan edi.

– Qabyldanǵan sharalardyń nátıjesinde olardyń sany 90-shy jyldardaǵy eń tómengi deńgeıden eki esege artyp, 180-ge deıin jetti. Janýardyń bul túrin saqtap qalý jumystary jalǵasýda, transshekaralyq jáne halyqaralyq yntymaqtastyq belsendi damyp keledi, – dedi E. Nysanbaev.

Buǵan deıin Erlan Nysanbaev Qazaqstanǵa Nıderlandydan jetkizilgen jolbarystardyń alǵashqy qysy qalaı ótip jatqanyn aıtyp berdi.

Sondaı-aq, 1 qańtardan bastap, Qazaqstanda kóshpeli tsırkter men zoobaqtarǵa tyıym salynady.