Qazaqstanda qansha qar barysy meken etedi
SAMARQAN. KAZINFORM – Búginde Qazaqstan aýmaǵynda tirshilik etetin ilbisterdiń sany jylyna 5-6 basqa kóbeıip keledi. Muny Samarqanda ótip jatqan únemi qonys aýdaryp tirshilik etetin jabaıy janýar túrlerin saqtaý konventsııasynyń kezekti otyrysy (COP 14) aıasynda Zoologııa ınstıtýtyna qarasty qar barysyn baqylaý ortalyǵynyń basshysy Alekseı Grachev aıtty, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
«Qazaqstanda qar barysynyń sany turaqty túrde ósip keledi. Búginde elimizde shamamen 190 ilbis bar. Ekologııa jáne tabıǵı resýrstar mınıstrligi, sonymen qosa qar barysyn qorǵaýmen aınalysyp júrgen mamandardyń qoldaýymen elimizdegi 15 erekshe qorǵaýǵa alynǵan aýmaqta barlyq jaǵdaı jasaldy. Qazirgi tańda ulttyq tabıǵı parkter men qoryqtar atalǵan janýarlar úshin qaýipsiz. Biz únemi monıtorıng júrgizip, jıi fototuzaq aýmaqtaryn uıymdastyramyz. Onyń nátıjesinde ilbisterdiń mıgratsııasyn, ómir súrý, ortaǵa beıimdelý erekshelikterine taldaý jasalady», — dep málim etti Alekseı Grachev Kazinform tilshisiniń saýalyna jaýap bere otyryp.
Qazaqstanda tuńǵysh ret qar barysyn sanaý jumysy 1978 jyly qolǵa alynǵan. Tıisinshe, 1980 jyly elimizdiń aýmaǵyn 200-ge jýyq ilbis meken etkeni anyqtaldy.
«Sol kezeńde qar barysy Qazaqstannyń Qyzyl kitabyna engizildi. 1990-shy jyldardan bastap olardyń sany aıtarlyqtaı qysqardy. Keıingi ýaqytta ilbisterge arnalǵan ekojúıeni jaqsartý esebinen olardyń qatary artty. Sońǵy 3-5 jyldaǵy qar barysynyń ortasha jyldyq ósimi — 5-6 bas», — dedi QR Ǵylym jáne joǵary bilim mınıstrliginiń Zoologııa ınstıtýtyna qarasty qar barysyn baqylaý ortalyǵynyń basshysy Alekseı Grachev.
Aıta keteıik, bul kúnderi Samarqan qalasynda únemi qonys aýdaratyn jabaıy janýar túrlerin saqtaý konventsııasynyń kezekti otyrysy ótip jatyr.
Shara aıasynda Qazaqstan, Ózbekstan jáne Qyrǵyzstan elderi Afrıka men Eýrazııa aýmaqtarynda únemi qonys aýdaryp meken etetin jyrtqysh qustardy saqtaý jónindegi halyqaralyq memorandýmǵa qosyldy.
Atalǵan qujat qustardyń tirshilik etý ortasyn saqtaý, olarǵa qolaıly ekojúıe qurýdy qamtıdy.
