Qazaqstanda qandaı mamandyq ıeleri tapshy

ASTANA. QazAqparat – Elimizde qazir qaı mamandyq ıeleri tapshy jáne bolashaqta qandaı mamandar suranysqa ıe bolady? Bul týraly Eńbek jáne halyqty áleýmettik qorǵaý vıtse-mınıstri Erbol Ospanov málim etti, dep habarlaıdy QazAqparat tilshisi.

«Jalpy, eńbek naryǵy jyldam ózgeredi. Ol ekonomıka jáne tehnologııanyń damýymen baılanysty. Ózderińiz biletindeı, pandemııa kezinde eńbek naryǵy kúrt ózgerdi. Pandemııaǵa deıin úıde otyryp jumys isteımiz dep kim oılapty? Sondyqtan, biz eńbek naryǵynda qandaı mamandyqtar suranysqa ıe nemese tapshy ekenin qadaǵalaımyz. Statıstıka bar. Qazir elimizde mektepke deıingi bilim berý uıymy mamandary jáne mektep muǵalimderi tapshy. Sebebi, jyl sanap ashylyp jatqan balabaqshalar men mektepterdiń sany artyp keledi. Ekinshiden, aýyl sharýashylyǵy salasy mamandary tapshy», - dedi Eńbek jáne halyqty áleýmettik qorǵaý vıtse-mınıstri Erbol Ospanov OKQ-de ótken brıfıngide.

Odan bólek, vıtse-mınıstr elimizde IT jáne qurylys mamandarynyń da tapshy ekenin tilge tıek etti.

«Bizdiń mınıstrlik jańa mamandyqtar atlasyn jasady. Oǵan sáıkes aldaǵy jyldary kıberqaýipsizdik, densaýlyq saqtaý, óner jáne bilim berý mamandary suranysqa ıe bolady», - deıdi ol.

Aıta ketsek, eńbek mınıstri orynbasary Erbol Ospanov málimdegendeı, qazir elimizde 39 myń Reseı azamaty jumys istep jatyr.