Qazaqstanda qandaı kólikter jıi urlanady

ASTANA. KAZINFORM – 2025 jyldyń alǵashqy toǵyz aıynda elimizde avtokólik urlyǵy ótken jylmen salystyrǵanda 70 paıyzǵa tómendedi. Bul týraly Kazinform agenttiginiń saýalyna jaýap bergen Іshki ister mınıstrligi habarlady.

Mınıstrliktiń málimetinshe, avtokólik urlyǵy eń kóp Almaty qalasy, sondaı-aq Almaty jáne Qostanaı oblystarynda tirkelgen.

- Barlyq jasalǵan qylmystar boıynsha jedel-izdestirý is-sharalary júrgizilip, kúdiktiler ustaldy, urlanǵan kólikter izdestirilip jatyr, - delingen jaýapta.

ІІM dereginshe, bıyl jasalǵan qylmystardyń 75 paıyzy ashylǵan. Qazirgi tańda 12 urlanǵan kóliktiń ornalasqan jerin anyqtaý baǵytyndaǵy sharalar jalǵasyp jatyr.

- Jıi urlanatyn kólikter qatarynda Reseıde shyǵarylǵan avtokóliktermen birge Lexus, Toyota, KIA jáne BMW markalary bar, - delingen habarlamada.

Vedomstvo urlyq sanynyń tómendeýine birneshe faktor áser etkenin atap ótti.

- Olardyń qatarynda beınebaqylaý kameralarynyń sanynyń artýy, avtokólikterdiń zamanaýı GPS-navıgatsııa quraldarymen jabdyqtalýy, quqyqbuzýshylyqtardyń aldyn alý boıynsha azamattar men BAQ arasynda aqparattyq-túsindirý jumystarynyń júrgizilýi, shekaralyq baqylaýdyń kúsheıýi jáne jazanyń bultartpastyǵy bar, - dep túıindedi Іshki ister mınıstrligi.

Buǵan deıin ınternet alaıaqtyqtyń jańa túri týraly jazdyq. Bul logıstıkalyq kompanııalar men kólik ıeleri arasyna jasyryn deldaldyq ornatyp, jańadan alynǵan avtolardy urlaý áreketi ekenin jazǵanbyz.