Qazaqstanda IT páni muǵalimderi daıarlanady

ASTANA. QazAqparat – Bıyl jeltoqsannan bastap elimizde IT pániniń muǵalimderi daıarlana bastaıdy. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın málim etti, dep habarlaıdy QazAqparat tilshisi.

«TechOrda baǵdarlamasy aıasynda IT kásibin ıgergisi keletin qazaqstandyqtarǵa jeke ozyq IT mektepterde vaýcherlik júıe negizinde bilim alý múmkindigi qarastyrylǵan. Joba aıasynda azamattar óziniń biliktiligin jetildire alady. Mysaly, búginde baǵdarlama boıynsha 2000 adam IT salasyn ıgerdi. Olar jalaqysy 450 myń teńge bolatyn jumysqa ornalasa alady. Halyqaralyq seriktestermen yntymaqtastyq ta elimizdiń adamı kapıtalynyń damýyna oń yqpalyn tıgizedi», - dedi Baǵdat Mýsın Úkimet otyrysynda.

Mınıstrdiń aıtýynsha, halyqaralyq alyp kompanııalarmen birge oqý kýrstary ázirlenedi.

«Osy baǵytta qoldaý kórsetkeni úshin Ǵylym jáne joǵary bilim mınıstrligine alǵys bildiremin. Osy trendti jalǵastyrý úshin bıyl 1-shi jeltoqsannan bastap ІT pániniń muǵalimderin oqytý tetigi engiziledi. Oqý sapasyn arttyrý úshin jyl sońyna deıin ІT fakýltetterge tıisti sapa standarttaryn engizý jumystaryn bastadyq. Biz Ǵylym jáne joǵary bilim mınıstrligimen birlesip, óńirlik oqý oryndaryndaǵy IT fakýltetterine tıisti aýdıt júrgizemiz. Jergilikti ákimdikter osy jumystardyń qarqynyn arttyrý úshin óńirlerde IT jobalaý mektepterin qoldap, bıznespen tyǵyz jumys júrgizýi kerek», -deıdi ol.