Qazaqstanda IT mamandarǵa arnalǵan sertıfıkattaý ortalyqtary ashylady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın men Bilim jáne ǵylym mınıstri Ashat Aımaǵambetov tsırflandyrýdyń bilim berý úrdisin qalaısha ońtaılandyryp, jaqsartatynyn talqylady, dep habarlaıdy QazAqparat, mınıstrdiń Facebook-tegi paraqshasyna silteme jasap.

Baǵdat Mýsınniń málimdeýinshe, bilim jáne ǵylym mınıstrimen kezdesý beıresmı túrde ótken. Kezdesýdiń negizgi maqsaty usynystardy aıtyp, BǴM tarapyn tyńdaý jáne bilim berýdi tsıfrlandyrýdaǵy problemalardyń sheshimin anyqtaý bolǵan.

«Birinshiden, AT salasynyń damýy tsıfrlyq transformatsııamen tikeleı baılanysty. QR BǴM-men birlesip, bilim berý úderisine otandyq AT-sheshimderin kedergisiz engizý maqsatynda jaǵdaı jasaý – negizgi mindetterdiń biri. Osy turǵyda Ashat Qanatuly menen tsıfrlyq sheshimderdi toptastyrýdy surady. Men óz kezegimde, AT kompanııalaryn usynystarymen bizben belsendi túrde jumys jasaýǵa shaqyramyn», - dedi mınıstr.

AT boıynsha kásibı standarttardy ózektendirý jáne bilim berý baǵdarlamalarynyń tizimin qaıta qaraý týraly sheshim qabyldandy. Olar naryq talaptaryna saı bolýy tıis.

«Búkil salanyń taǵdyry AT kadrlaryn daıarlaý sapasyna baılanysty ekenin atap ótkim keledi. Munaısyz benzın ala almaımyz, sol sekildi sapaly bilimsiz bilikti mamandar da bolmaıdy», - dep ótti vedomstvo basshysy.

«Ekinshiden, AT-mamandary úshin Sertıfıkattaý ortalyqtaryn ashý týraly sheshim qabyldandy. Sheteldik balamalardan birneshe ese arzan sapaly ortalyqtar JOO túlekterin tekserip otyrady. Qandaı joǵary oqý oryndarynyń naryqqa bilikti mamandardy usynýǵa daıyn ekendigin anyqtaý qajet. Sonymen qatar stýdentterdi nemquraıly oqytatyndardan lıtsenzııa alýdy qarastyramyz, óıtkeni oqý oryndarynyń mundaı áreketine jol berilmeý kerek. Túlekter suranysqa ıe jáne básekege qabiletti bolýy tıis. Túpki nátıje – naryqqa sapaly AT-mamandardy «daıarlaý», - dep qosty Baǵdat Mýsın.

Úshinshiden, 2022 jyldan bastap AT mamandyqtaryna túsetin túlekter fızıkanyń ornyna ınformatıka tapsyratyn bolady.

«Tórtinshiden, qashyqtan bilim berý máselesin talqyladyq. Bizdiń platformalar indet kezinde kómekshi boldy. Biraq biz bilim berýdi derbesteýge ákeletin kelesi qadamdar týraly kelistik. Mindetti túrde muǵalimdi emes, oqýshyny júıemen basqarý algorıtmderi qoldanylýy tıis. Júıeniń ózi muǵalimge de, oqýshyǵa da bilimdi qaı baǵytta kúsheıtý kerektigin jáne nege basa nazar aýdarý kerektigin aıtady. Qarapaıym sózben aıtqanda: eger siz bólshekterdi ıgermegen bolsańyz, logarıfmderdi qalaı úırenesiz? Júıe oqýshyny jetelep, muǵalimdi habardar etýi tıis. Bul muǵalimderdiń jumysyn avtomattandyrady, olarǵa tálimgerlik etýge ýaqyt bóledi», - dep túsindirdi mınıstr.

Besinshiden, jyl saıyn AT mamandaryn daıarlaıtyn barlyq 84 JOO-ǵa taldaý júrgiziledi. Mundaı taldaý QR BǴM-ǵa qajet bolǵan jaǵdaıda tıisti tekserý júrgizýge múmkindik beredi.

«Altynshydan, QR BǴM Qazaqstannyń jetekshi kompanııalaryna qamqorlyq ete alatyn 5-10 joǵary oqý ornynan AT fakýltetterdi belgileıdi. Kompanııalardyń da JOO bilim berý úderisine tikeleı qatysýy, olardyń saıasatyn aıqyndaýy jáne bilim berý baǵdarlamasy men taǵylymdamalaryna kómektesýi mańyzdy. Qarjylyq qoldaý da joqqa shyǵarylmaıdy. AT salasynda praktıkalyq bilim men tálimgerlik mańyzdy», - dedi Baǵdat Mýsın.