Qazaqstanda Islam damý bankiniń qoldaýymen 4 jańa sý qoımasy salynady
ASTANA. KAZINFORM – Sý salasyn damytý boıynsha seriktesterdiń Úılestirý keńesiniń II otyrysy aıasynda Sý resýrstary jáne ırrıgatsııa mınıstri Nurjan Nurjigitov Islam damý bankiniń Qazaqstandaǵy óńirlik ókildigi basshysynyń mindetin atqarýshy Alı Han jáne BUU Damý Baǵdarlamasynyń QR-daǵy Turaqty ókili Katarjına Vavernıamen kezdesti.
Mınıstrliktiń málimetinshe, taraptar «Klımatqa tózimdi sý resýrstaryn damytý» jobasyn iske asyrý boıynsha birlesken jumysty talqylady.
Jobada Astana sý qoımasyn tolyqtyrý jónindegi jobany qosa alǵanda, 4 jańa sý qoımasyn salý jáne jumys istep turǵan 4 sý qoımasyn rekonstrýktsııalaý, 115 arnany rekonstrýktsııalaý jáne kúrdeli jóndeý kózdelgen.
Jumystar Aqmola, Almaty, Jambyl, Qyzylorda, Túrkistan, Batys Qazaqstan, Jetisý oblystarynda jáne Astana qalasynda júzege asyrylady. Sondaı-aq Qazaq sý sharýashylyǵy ǵylymı-zertteý ınstıtýtyna elimizdiń sý jáne ózen basseınderin zertteýge, Sý resýrstarynyń aqparattyq-taldaý ortalyǵy úshin erte den qoıý júıelerin engizýdi baǵalaýǵa jáne «Qazsýshar» kásipornyn tehnıkalyq jaraqtandyrýǵa Islam damý bankiniń grantyn bólý kózdelgen.
Qazir barlyq qajetti qujatty ázirleý jáne olardy basqa memlekettik organdarmen kelisý júrgizilip jatyr.
- Qysqa merzim ishinde Úılestirý keńesi aıasynda úlken jumys atqaryldy. Islam damý bankiniń ınvestıtsııalary Qazaqstannyń sý ınfraqurylymyn jetildirýge kómektesedi. Sonymen qatar biz elimizdiń sý salasyn damytý jobalaryna jańa seriktester tartý úshin BUU Damý baǵdarlamasymen belsendi yntymaqtastyqty jalǵastyrýǵa nıettimiz, - dep atap ótti Sý resýrstary jáne ırrıgatsııa mınıstri Nurjan Nurjigitov.
Qazaqstanda tasqyn qaıtalana bermeý úshin neshe sý qoımasy kerek ekenin jazǵan bolatynbyz.