Qazaqstanda ınvestorlardy qorǵaıtyn keńse qurylady
Ózara is-qımyl týraly memorandýmǵa QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev, Investıtsııalar jáne damý mınıstri Jeńis Qasymbek jáne Syrtqy ister mınıstri Qaırat Ábdirahmanov qol qoıdy.
Alık Shpekbaevtyń aıtýynsha, áli kúnge deıin elimizde ınvestorlarǵa óz áleýetin tolyq ashyp, jańa bıznes-ıdeıalaryn iske asyrýǵa kedergi keltiretin máseleler bar. Jemqorlyq qaýip-qater men ákimshilik kedergiler de problemalyq máselelerdiń biri.
«Agenttik bıznestegi sybaılas jemqorlyq pen zańsyz aralasýdy joıý úshin júıeli jumystar júrgizýde. Sońǵy úsh jylda dál osyndaı 976 fakti anyqtalyp, 389 laýazymdy tulǵa sottalǵan. Júrgizilgen sharalar bes júzden astam kásipkerdiń quqyǵyn qorǵaýǵa múmkindik berdi. Jasyrary joq, zańsyz aralasý faktileriniń barlyǵy bizge jete bermeıdi. Endi árbir faktige jyldam jaýap qatatyn mezgil jetti. Sondyqtan, búgin Agenttik + Investıtsııalyq Ombýdsmen ınstıtýty + Syrtqy ister mınıstrligi formýlasynda birlesken kúshti nyǵaıtý týraly memorandýmǵa qol qoıamyz», - dedi Agenttik basshysy Astanada Qazaqstandaǵy ınvestıtsııalyq ahýalǵa arnalǵan birinshi halyqaralyq bıznes-forýmda.
A. Shpekbaevtyń aıtýynsha, Jobalyq keńse sybaılas jemqorlyqpen baılanysty barlyq shyǵyndardy retteýmen jáne ınvestorlar men kásipkerlerdi qysymnan qorǵaýmen aınalysady.
QR Investıtsııalar jáne damý mınıstri Jeńis Qasymbek ótken jyly ınvestıtsııalyq ombýdsmenge 43-ten astam ótinish kelip túskenin atap ótti. Investorlardyń basym bóligi salyq, keden, eńbek, kóshi-qon jáne jer qatynastaryn retsenzııalaý salasyndaǵy zańnamalar boıynsha kedergilerge tap bolǵan.
Óz kezeginde QR Syrtqy ister mınıstri Qaırat Ábdirahmanov qıyndyqqa tap bolǵan sheteldik ınvestorlarǵa qol ushyn sozýǵa ázir ekendigin jetkizdi.
«Qazaqstandaǵy jeke sektorda aıtarlyqtaı kúrdeli máseleler joq dep úmittenemin. Degenmen, qazirgi ýaqytta bıznes-orta erekshe qarqynmen damyp keledi. Áriptesim Jeńis Qasymbekten (QR Investıtsııalar jáne damý mınıstri - red.) 2018 jyldyń alǵashqy toqsanynda Qazaqstandaǵy sheteldik tikeleı ınvestıtsııalar kólemi 40%-ke artqanyn bildim. Sondyqtan túrli ınvestorlyq jobalardy júzege asyrýda qandaı da bir kedergilerge tap bolsańyz, esh qysylmastan Mınıstrlik (QR Syrtqy ister mınıstrligi - red.) pen ózge memorgandarǵa saýal joldańyz. Sonymen birge, dıplomatııalyq korpýs pen bıznes-qaýymdastyqtyń ózge de uıymdary arqyly júginýge bolady», - dep eske saldy Qaırat Ábdirahmanov.