Qazaqstanda ınflıatsııa baıaýlady

ASTANA.KAZINFORM – bıyl qańtar aıynda Qazaqstandaǵy ınflıatsııa deńgeıi 12,2 paıyzdy qurap, byltyr jeltoqsandaǵy 12,3 paıyzben salystyrǵanda tómendedi. Aılyq ınflıatsııa 1 paıyz boldy (jeltoqsanda – 0,9%). Bul týraly Ulttyq statıstıka bıýrosy málimdedi.

Atap aıtqanda, jyldyq mánde azyq–túlik taýarlarynyń baǵasy 12,9 paıyzǵa ósti (jeltoqsanda – 13,5%), aqyly qyzmetter – 12 paıyzǵa, azyq–túlik emes taýarlar – 11,7 paıyzǵa qymbattady (jeltoqsanda – 11,1%).

Sonymen qatar jalpy ınflıatsııa deńgeıine eń úlken úlesti azyq–túlik ónimderi men alkogolsiz sýsyndar qosty – 5,4 paıyzdyq tarmaq. Sondaı-aq kólik qyzmetteri – 1,1 paıyzdyq tarmaq, jeke kútim, áleýmettik qorǵaý jáne ózge de taýarlar men qyzmetter, sondaı–aq kıim men aıaq kıim – árqaısysy 1 paıyzdyq tarmaqtan áser etti.
Qańtar aıynda azyq–túlik emes taýarlar 1,2 paıyzǵa, aqyly qyzmetter 1,1 paıyzǵa, al azyq–túlik ónimderi 0,8 paıyzǵa qymbattady.

Jyldyq ınflıatsııanyń eń joǵary deńgeıi Soltústik Qazaqstan oblysynda tirkeldi – 14,3 paıyz. Sondaı–aq Aqmola, Pavlodar jáne Ulytaý oblystarynda ınflıatsııa deńgeıi 13,5 paıyzdy qurady.

Jekelegen taýarlar men qyzmetter arasynda baǵanyń eń joǵary ósimi et pen qus etine tıesili boldy – 23 paıyz. Benzın baǵasy 16,8 paıyzǵa, alkogolsiz sýsyndar da 16,8 paıyzǵa qymbattady. Aqyly qyzmetter sektorynda sý burý qyzmetteri 18,7 paıyzǵa, gaz 16,2 paıyzǵa, onyń ishinde suıytylǵan gaz 24,7 paıyzǵa ósti.

Sonymen qatar keıbir taýarlar boıynsha baǵanyń tómendeýi baıqaldy. Atap aıtqanda, kókónisterdiń baǵasy jyldyq mánde 2,7 paıyzǵa arzandasa, sýyq sý tarıfi 12,9 paıyzǵa tómendedi.

Aıta keteıik, 2026 jylǵy qańtardan bastap Ulttyq statıstıka bıýrosy tutyný baǵalary ındeksin ınflıatsııany esepteýdiń jańartylǵan ádisin engizdi.