Qazaqstanda Herıot-Ýatt ýnıversıtetiniń fılıaly ashylady

ASTANA. QazAqparat – Q.Jubanov atyndaǵy Aqtóbe óńirlik ýnıversıtetiniń bazasynda Ulybrıtanııa jáne Soltústik Irlandııa Birikken Koroldigi Herıot-Ýatt ýnıversıtetiniń fılıaly ashylady, dep habarlaıdy QazAqparat tilshisi.

«Q.Jubanov atyndaǵy Aqtóbe óńirlik ýnıversıtetiniń bazasynda Ulybrıtanııa jáne Soltústik Irlandııa Birikken Koroldiginiń Herıot-Ýatt ýnıversıtetiniń fılıaly qurylsyn. Oqý ornynyń negizgi qyzmet nysany bilim berý qyzmetterin kórsetý, ǵylymı jáne ǵylymı-tehnıkalyq qyzmetpen aınalysý fılıaldar qyzmetiniń negizgi nysanasy bolyp aıqyndalsyn. Fılıaldaǵy bilim berý protsesi sheteldik professorlyq-oqytýshylyq quramdy tarta otyryp, memlekettik, aǵylshyn jáne orys tilderinde júrgiziledi, olardyń úlesi fılıaldyń professorlyq-oqytýshylyq quramynyń jalpy sanynyń keminde 30%-yn quraıdy», - delingen Ashyq NQA portalynda jarııalanǵan Úkimet qaýlysynyń jobasynda.

Qujatta jazylǵandaı, Herıot-Ýatt ýnıversıtetiniń fılıalyn QR memlekettik bilim berý tapsyrysy sheńberinde alynǵan qarajat jáne zańmen tyıym salynbaǵan ózge de kózder esebinen júzege asyrylady.

Qujat 4 shildege deıin kópshilik talqylaýda bolady. Keıin qol qoıý úshin Premer-Mınıstrge joldanady.