Qazaqstanda Gollıvýd fılmderi túsiriletin bolady

ASTANA. QazAqparat - Kalıfornııa shtatyndaǵy Los-Andjeles qalasynyń ortalyǵynda ornalasqan Gollıvýd aýdany álemge amerıka kınoóndirisimen tanymal. Sebebi bul jerde júzdegen úlkendi-kishili kınostýdııalar bar. Al turǵyndaryn kóptegen tanymal kınoakterler quraıdy. Biraq Gollıvýd fılmderi san alýan sıýjetke qaraı túrli elderde túsiriletini qupııa emes. Búgingi tańda Qazaqstannyń keń dalasy da sondaı fılmder túsiriliminiń alańyna aınalýy múmkin. Buǵan ótken aptada QR Mádenıet jáne sport mınıstri Arystanbek Muhamedıuly jetekshi Gollıvýd kınokompanııalarynyń prodıýserlerimen ortaq jobalar boıynsha yntymaqtastyq máselelerin talqylaýy sebep boldy.

Aıta keteıik, Mádenıet jáne sport mınıstrimen kezdesýge álemdik kınokompanııa tarapynan tanymal prodıýserler keldi. Olardyń ishinde  The Walt Disney Company-dan M. Hıý, NBC Universal ókili L. Ýlman, sondaı-aq, G. Lı, V. Mendoza, M. Valbreht, D. Roı bar. Al Qazaqstan tarapynan Qazaqstannyń AQSh-taǵy elshisi Erjan Qazyhanov jáne Kınematografııalyq óner men ǵylym akademııasynyń prezıdenti Aıman Musaqojaeva qatysty. Álemniń ozyq kınokompanııalarymen elimizdiń mádenıet salasyndaǵy ýákiletti organ basshylyǵynyń kezdesýi egemendi el tarıhynda alǵashqy ret ótip jatqandyǵyna erekshe atap ótse bolady.  

«Búgingi tańda kıno degenimiz - tek ónerdiń bir túri ǵana emes, sonymen qatar, ekonomıka salasynyń anyqtaýyshy. Máselen, «Avatar» fılmi jaryqqa shyqqanda, túsirilim alańyna aınalǵan Jańa Zelandııaǵa álemniń túkpir-túkpirinen týrıster kele bastaǵany belgili. Tipti keıbir memleketter kınoóndirý salasynda qyzmet kórsetýdi tabys kózine aınaldyrǵan. Olardyń qatarynda Vengrııa, Bolgarııa, Kanada syndy memleketter bar, - dedi mınıstr Arystanbek Muhamedıuly.

Sonymen birge, kezdesý barysynda aldaǵy ýaqytta Qazaqstandaǵy kınoındýstrııa damýynyń barlyq qyr-syrlaryn qamtıtyn «Kıno týraly zań» qabyldanatyny belgili boldy.

Sondaı-aq, mınıstr Muhamedıulynyń aıtýynsha, búgingi tańda negizgi maqsat - Qazaqstan kınoındýstrııasynyń álemdik keńistiktegi orny joǵary bolýyn qamtamasyz etý.

«Biz amerıkalyq kórermenderge «Anaǵa aparar jol» fılmin usyndyq. Ony bul jerde úlken qyzyǵýshylyqpen qabyldady. Qazaqstan kınoóneri halyqaralyq kınofestıvalderde laıyqty tanystyrylyp, joǵarǵy marapatqa ıe bolǵandyǵyn qalaımyz» - dep qorytyndylady vedomstvo basshysy.

Esterińizge sala keteıik, bıyl kınematografııa salasyndaǵy «Tulpar» ulttyq kınojúldesiniń saltanatty sharasynda «Oskar» syılyǵyna Qazaqstan atynan bas prodıýseri Álııa Nazarbaeva men rejısseri Aqan Sataevtyń birlesip túsirgen «Anaǵa aparar jol» kartınasy usynylatyny belgili boldy. Atalmysh týyndy 14 otandyq jáne 4 sheteldik  fılmniń arasynan jeńimpaz atandy. Daýys berý jabyq túrde ótti. Fılmde basty rólderdi Ádil Ahmet, Altynaı Nókerbek pen Arýjan Jazylbekova somdaıdy.

Qazaqstan Respýblıkasy Mádenıet jáne sport Mınıstrligi álemniń jetekshi kınokompanııalarymen kınoóndiris salasynda yntymaqtastyq týraly kelissózder ótkizgen bolatyn.  Los-Anjeleske issapar jáne «Rýhanı jańǵyrý» baǵdarlamasyn tanystyrý aıasynda Mınıstrlik Qazaqstan Respýblıkasynyń AQSh-taǵy Elshiligimen birlese  «Spirit of Great Steppe» sharasyn ótkizdi. Birneshe qazaqstandyq fılmderdiń kórsetilimi, sondaı-aq QR Halyq ártisi Aıman Musaqojaeva, Dımash Qudaıbergen jáne taǵy basqa óner juldyzdarymen kontsert berildi.