Qazaqstanda farmatsevtıkaǵa qandaı qoldaý kórsetiledi

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov otandyq farmatsevtıka kásiporyndaryna qandaı qoldaý kórsetiletinin aıtyp berdi, dep habarlaıdy QazAqparat tilshisi.

Bul sharalar farmatsevtıkalyq jáne medıtsınalyq ónerkásipti damytýdyń 2020-2025 jyldarǵa arnalǵan keshendi josparynda kórsetilgen.

«Eýrazııalyq ekonomıkalyq odaq sheńberinde dárilik zattar men medıtsınalyq buıymdar aınalysy» bólimi odaq sheńberinde talaptardy úndestirýdi, eksportty ilgeriletý jáne otandyq ónim qunyn tómendetý úshin odaq standarttaryn engizýdi kózdeıdi. Osy maqsatta dárilik zattar men medıtsnalyq buıymdardy tirkeý men saraptaý kezinde ulttyq rejımnen EAEO rejımine kóshý usynylady. Shıkizat pen jınaqtaýshy materıaldar úshin kedendik baj mólsherin tómendetý josparlanǵan», - dedi mınıstr búgingi Úkimet otyrysynda.

Sonymen birge, GLP standarttaryna sáıkes keletin otandyq zerthanalardy damytý boıynsha jeke normatıvtik quqyqtyq baza ázirleý kózdelgen.

«Otandyq ónimniń baǵa jaǵynan básekege qabiletin arttyrý úshin memlekettik qoldaý sharalary ázirlenedi. Onda dárilerdiń klınıkalyq synaqtaryn júrgizýge ketetin shyǵyndy qaıtarý el aýmaǵynda óndirilmeıtin shıkizatty ımporttaýǵa arnalǵan shyǵyndy tańbalaý jáne sýbsıdııalaý qarastyrylady», - dedi B. Atamqulov.

Salany kadrlyq qamtamasyz etý úshin farmatsevtıkalyq ónim óndirýshilerdiń qajettilikterin eskerip, elimizdiń JOO-larynda memlekettik bilim berý tapsyrysymen mamandar daıarlanýda. Dárilik zattar salasyndaǵy kásibı standarttar jańartylyp, ulttyq biliktilik sheńberimen úılestiriledi.

«Farmatsevtıkalyq ónim óndirisin odan ári yntalandyrý úshin AEA aýmaqtary men qyzmet túrleri keńeıtiledi. Ǵylymı zertteý jáne tájirıbelik jumystar sheńberinde farmatsevtıkalyq jáne medıtsınalyq ónerkásipti damytýdyń perspektıvalyq sektoryn aıqyndaý boıynsha orta merzimge boljam jasalyp, taldaý júrgiziledi. Ónim sapasyn arttyrý jáne kóleńkeli ekonomıkany azaıtý úshin dárilik zattardy tańbalaý men qadaǵalaý boıynsha pılottyq joba engiziledi. Sondaı-aq mindetti tańbalaýǵa jatatyn taýarlar tizbesi keńeıtiledi. Dárilik zattardy tańbalaý jáne onyń balama tásilderin engizý kezeńderi aıqyndalady», - dedi Beıbit Atamqulov.

Aıta keteıik, jyl basynan beri otandyq kásiporyndar farmatsevtıka óndirisin 34,1% nemese 81,5 mlrd teńgege arttyrdy. Investıtsııa 5,2% artyp, 4,1 mlrd teńgeni qurady.

Farmatsevtıkalyq qyzmetti zańnamalyq retteý aıasynda otandyq óndirýshiler men sheteldik ınvestorlar úshin farmatsevtıka ónimderiniń ishki naryqqa shyǵýyn ońaılatý qarastyrylǵan.