Qazaqstanda erkekterdiń dekretke shyǵýy jıilep barady
«2016 jyly atalǵan áleýmettik tólem alýshylardyń jalpy sanynyń 98 paıyzyn áıelder, tek 2 paıyzyn erkekter quraǵan bolatyn. Al 2017 jyly 1 jasqa deıingi balanyń kútimine baılanysty kirisinen aıyrylǵan jaǵdaıda áleýmettik tólem alýǵa ótinim bergenderdiń jalpy sanynyń 8 paıyzyn erkekter qurady», - delingen QR Eńbek jáne halyqty áleýmettik qorǵaý mınıstrliginiń «QazAqparattyń» resmı saýalyna bergen jaýabynda.
Astana qalasynyń turǵyny Ilzat Safarǵalıevtiń aıtýynsha, mundaı sheshim qabyldaýyna jubaıyna qaraǵanda óziniń jalaqysynyń joǵary bolýy sebep bolǵan.
Aıta keterligi, bala dúnıege kelgende tólenetin tólemaqynyń birneshe túri bar. Birinshisi, jumys isteıtin áıelge tıesili dekrettik tólemaqy. Ol bir-aq ret beriledi. Ony esepteýdiń ózindik úlgisi bar. Tabys mólsheri naqty jumys istegen merzimine qaramastan bala týǵanǵa deıingi sońǵy jyldaǵy áleýmettik aýdarymdar boıynsha anyqtalady. Tólem mólsherin sońǵy jyldyń ortasha aılyq tabysyn 10% mólsherindegi zeınetaqy aýdarymdaryn shegerýmen eńbekke jaramsyzdyq kúnderiniń koeffıtsıentine kóbeıtý arqyly bilýge bolady. Ortasha aılyq tabys jyl boıǵy jalpy tabysty 12 aıǵa bólgende anyqtalady. Eńbekke jaramsyzdyq kúnderiniń koeffıtsıenti júktiligi jáne bosanýyna baılanysty demalys kúnderiniń sanyn 30 kúnge bólýmen anyqtalady. Sol sebepti maksımaldy koeffıtsıent 126/30=4,2 teńeledi.
Bala týǵandaǵy birjolǵy jórgekpul mólsheri zańmen bekitilgen. Birinshi, ekinshi jáne úshinshi balaǵa - 30 aılyq eseptik kórsetkish (AEK), al, tórtinshi, besinshi, altynshy jáne t.b. balalarǵa - 50 AEK tólenýge tıis.
Al, sol balanyń bir jasqa deıingi kútimi úshin aı saıynǵy járdemaqyny alýǵa sábıdiń anasy nemese ákesi ótinish bere alady.
Eńbek jáne halyqty áleýmettik qorǵaý mınıstrliginiń málimetinshe, 2017 jyldyń 9 aıynda Áleýmettik saqtandyrý qorynan júktilik pen bala týǵany úshin 48 mlrd teńge, 1 jasqa deıin bala kútimi úshin 53 mlrd teńge tólengen.
