Qazaqstanda energııa jınaqtaıtyn «alyp paýerbankter» salynady
ASTANA. KAZINFORM — Qazaqstanda energojúıeniń manevrlik múmkindigin arttyrýǵa baǵyttalǵan gıdroakkýmýlıatsııalyq elektr stantsııalaryn salý josparlanyp jatyr. Búginde Almaty oblysynda eki GAES jobasy pysyqtalyp jatyr. GAES «energetıkalyq akkýmýlıator» qaǵıdatymen jumys isteıdi: elektr energııasy artyq óndirilgen kezeńde sý joǵarǵy sý qoımasyna aıdalady, al tutyný sharyqtaǵan ýaqytta tómenge jiberilip, týrbınalar arqyly elektr energııasy óndiriledi
Búgin Jaqyp Haırýshevtiń tóraǵalyǵymen Energetıka mınıstrligi janyndaǵy Qoǵamdyq keńestiń otyrysy ótti. Otyrysqa energetıka vıtse-mınıstri Suńǵat Esimhanov, Qoǵamdyq keńes músheleri, sondaı-aq mınıstrliktiń qurylymdyq bólimsheleri men uıymdardyń ókilderi qatysty.
Otyrys barysynda 2025–2026 jyldardaǵy jylytý maýsymynyń ótýi, sondaı-aq energetıka salasyna jasandy ıntellekt pen tsıfrlyq tehnologııalardy engizý máseleleri qaraldy.
Sonymen qatar energııa jınaqtaý júıeleri naryǵyn damytý jáne gıdroakkýmýlıatsııalyq elektr stantsııalaryn engizý perspektıvalary talqylandy.
Qazaqstanda jańartylatyn energııa kózderiniń belsendi damýyna baılanysty energııa jınaqtaý júıeleri jobalary iske asyrylyp jatyr. Bul jel jáne kún elektr stantsııalarynda óndirilgen energııany jınaqtap, ony tutynýdyń sharyqtaý kezeńinde paıdalanýǵa múmkindik beredi.
«Jasyl» energetıka salasyna TotalEnergies, Masdar, China Power jáne China Energy sekildi iri halyqaralyq ınvestorlar tartylǵan. Atalǵan kompanııalar qýattylyǵy árqaısysy 1 GVt-qa deıin jetetin jel elektr parkterin salyp jatyr. Árbir jel parki janynan qýaty 300 MVt bolatyn energııa jınaqtaý júıelerin salý da kózdelgen. Búginde iske asyrylyp jatqan jobalardyń jıyntyq kólemi 1,6 GVt.
Aıta ketelik Úkimette ónerkásip, energetıka jáne kólik salalaryn damytý máseleleri qaralǵan edi.
