Qazaqstanda eń bedeldi IBO-2024 halyqaralyq olımpıadasy bastaldy
ASTANA. KAZINFORM - Astana qalasynda oqýshylar arasyndaǵy IBO-2024 bıologııadan halyqaralyq eń bedeldi olımpıadanyń saltanatty ashylý rásimi ótti,dep habarlaıdy QR Oqý-aǵartý mınıstrliginiń baspasóz qyzmeti.
Іs-sharaǵa QR Oqý-aǵartý mınıstri Ǵanı Beısembaev, IBO halyqaralyq komıtetiniń tóraǵasy Lenka Lıbýsova arnaıy qatysty.
Ashylý saltanatynda sóz sóılegen Ǵanı Beısembaev halyqaralyq olımpıadanyń bizdiń elimizde ótkizilýi asa mańyzdy ekenin atap ótti. Bıologııadan halyqaralyq olımpıada alǵash ret 34 jyl buryn ótkizildi, oǵan ol kezde tek 6 el qatysqan. Al búgin el astanasynda 81 memlekettiń komandalary jınaldy.
«Qazaqtyń uly aqyny, oıshyl Abaı Qunanbaıuly osydan bir jarym ǵasyr buryn: «Adamnyń kúshi onyń oıy men biliminde jatyr», — degen. Osy sózdiń búgingi kúni de ózekti ekenine kúmán joq. Sizderdiń kópshiligińiz bolashaqta belgili bıolog atanyp, myńjyldyqtyń orasan zor jańalyqtaryn ashasyzdar dep senemin. Osy Olımpıada árqaısyńyz úshin mamandyq tańdaýdyń, álemdik ǵylymnyń ıgiligi úshin eleýli jetistikterge jetýdiń mańyzdy kezeńine aınalatynyna senimdimin. Olımpıada Sizderge Qazaqstanmen tanysyp, bizdiń salt-dástúrimiz, qonaqjaılyǵymyz ben dostyǵymyzdan umytylmas áser qaldyrady dep oılaımyn», — dedi Ǵanı Beısembaev.
International Biology Olympiad álemdegi TOP-7 halyqaralyq olımpıadanyń biri. Bıylǵy jyly bilim dodasyna álemniń 81 elinen 305 jas bıolog pen 275 ǵalym qatysýda. Qazaqstandyq oqýshylar 28 jyldan beri atalmysh dodada el namysyn qoldan bermeı keledi, osy jyldar ishinde 70-ten asa marapatqa ıe boldyq. Uıymdastyrý komıtetiniń bıylǵy olımpıadany Qazaqstanda ótkizý týraly sheshim qabyldaýyna da bizdiń oqýshylarymyzdyń jetistikteri sebep boldy. Qatysýshylar tek zııatkerlik saıysqa ǵana qatysyp qoımaı, sondaı-aq, elordanyń kórikti jerlerin, Qazaqstannyń injý-marjany — Býrabaıdy aralaıdy, elimizdiń tarıhymen, ónerimen tanysady.
