Qazaqstanda «El qorǵany» medali bekitiledi

ASTANA. QazAqparat - QR Qorǵanys mınıstrligi qyzmet babynda zor jetistikke jetken áskerı qyzmetshilerdi marapattaýǵa arnalǵan «El qorǵany» medalin bekitýdi usyndy, dep habarlaıdy QazAqparat.

«Bul medalmen erekshelengen áskerı qyzmetshilerdi, generaldar quramyn, ofıtserlerdi, serjanttardy jáne jaýyngerlerdi marapattaýdy josparlaýdamyz. Buǵan qosa, Qarýly kúshterimizdiń qorǵanys qabiletin nyǵaıtýǵa úles qosqan el azamattary da marapattalatyn bolady», - dedi QR Qorǵanys mınıstri Sáken Jasuzaqov.
 

Eske sala ketsek, búgin Aqordada QR Memlekettik hatshysy Gúlshara Ábdiqalyqovanyń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııa otyrysy ótken bolatyn .
 

BAQ ókilderiniń saýalyna jaýap bere kele mınıstr bul usynysty Memleket basshysy qoldap otyrǵandyǵyn basa aıtty. 1 jáne 2-dárejeli bolatyn bul medaldi ústimizdegi jyly elimizdiń Qarýly kúshteriniń 25 jyldyq mereıtoıynda tabystaý kózdelgen.

«Menińshe, bul óte durys qadam. Bizdiń qatardaǵy jaýyngerlerimizden bastap generaldarymyzǵa deıin ózderiniń áskerı qyzmettegi aıryqsha qyzmeti úshin beriletin vedomstvolyq medalǵa ıe bolady», - dedi ol.