Qazaqstanda donorlyq aǵza kezeginde qansha adam tur

ASTANA. QazAqparat – Elimizde aǵzalardy transplantatsııalaýdy qajet etetin 3 562 naýqas kezekte tur. Mundaı derekter Densaýlyq saqtaý mınıstrligi ázirlegen salany damytýdyń arnaıy tujyrymdamasynda kórsetilgen, dep habarlaıdy QazAqparat tilshisi.

«Tujyrymdamada azamattyń (áleýetti donordyń) ózi qaıtys bolǵannan keıin donor bolýyna kózi tirisinde kelisim berýin, ıaǵnı aǵza donorlyǵyn jetildirý jáne damytý qarastyrylǵan.

2022 jylǵy 10 qyrkúıektegi jaǵdaı boıynsha kútý paraǵynda aǵza transplantatsııasyn qajet etetin 3 562 patsıent, onyń ishinde 77 bala (3 208 patsıent – búırek, 179 paııent – baýyr, 153 patsıent – júrek, 16 patsıent – ókpe jáne 6 patsıent ókpe-júrek keshenderin) transplantatsııany qajet etedi.

Densaýlyq saqtaýdyń transplantatsııa salasynda zamanaýı medıtsınalyq ınnovatsııalyq tehnologııalar damyǵan, daıyndalǵan mamandar bar. Degenmen, donor organdarynyń jetispeýshiligine baılanysty patsıentter transplantatsııa kezegin jyldar boıy kútedi nemese ony kútpeı kóz jumady.

Usynylyp otyrǵan túzetý donorlyq pýldy ulǵaıtýǵa jáne QR azamattarynyń aǵza jáne tinder transplantatsııasyna qol jetkizýine yqpal etedi, organdardy satyp alý - satý táýekelin barynsha azaıtady», - dep kórsetilgen qujatta.

Sonymen qatar vedomstvo medıtsına qyzmetkerleriniń qaýipsizdik máselesin sheshýdi usyndy. Mınıstrlik aqparatyna sáıkes, sońǵy ýaqytarda dárigerlerge naýqastar tarapynan shabýyl jasaý, mamandardyń ar-namysyn aıaqasty etý faktileri jıilegen.