Qazaqstanda dollardyń úlesi azaıyp keledi -Ulttyq bank

ASTANA. QazAqparat - Senattyń Qarjy jáne bıýdjet komıtetiniń keńeıtilgen otyrysynda QR Ulttyq bank tóraǵasynyń orynbasary Alpysbaı Ahmetov Qazaqstannyń altyn-valıýta qorynyń jaǵdaıy týraly aıtyp berdi, dep habarlaıdy QazAqparat.

«Bıylǵy bes aıda aldyn ala málimetter boıysha Ulttyq banktiń altyn-valıýta rezervteri 1,4 paıyzǵa ósti. Halyqaralyq rezervter Ulttyq qor aktıvterin qosa eseptegende 90,4 mlrd AQSh dollaryn qurady», - dedi A. Ahmetov.

Sonymen qatar ol elimizde dollarsyzdaný protsesi jalǵasyp kele jatqanyn atap ótti.

«Ulttyq valıýtadaǵy depozıtter qańtar-sáýirde 2,3 paıyzǵa nemese 9,4 trln teńgege deıin ósti. Al shetel valıýtasynda 8 paıyzǵa, ıaǵnı 7,7 trln teńgege deıin tómendedi. Jyl basynan beri shetel valıýtasyndaǵy salymdar 47-den 45 paıyzǵa deıin azaıdy», - dedi UB ókili.