Qazaqstanda densaýlyq saqtaý nysandaryn tekserý jumystary kúsheıtiledi - Birtanov
Bul týraly mınıstr Astanada ótken «Deni saý adamdardyń myqty ultyn qalyptastyrý» atty paneldik sessııada áńgimeledi.
«Prezıdent tapsyrmasymen júıeli sharalar qamtylǵan keshendi jospar ázirledik. Eń aldymen, taýarlar men qyzmetterdiń sapasyn baqylaıtyn komıtet qurylady. Sonymen birge, standarttaý boıynsha úlken jumystar júzege asyrylýy tıis. Barlyq sanıtarlyq talaptar men normalar zamanaýı ǵylymı jetistikterge sáıkes qaıta qaralýy kerek», - dedi Eljan Birtanov.
Mınıstr qoǵamdyq tamaqtaný men saýda salasynda standartty saqtamasa, taýarlardyń ótpeıtinin, kásipkerlerdiń muny jaqsy túsinip otyrǵanyn atap ótti.
«Ókinishke qaraı, densaýlyq saqtaý salasynda mundaı tekserýlerden bas tartýǵa týra keledi. Sebebi, erejelerge saı kelmegen jaǵdaıda, aýdandaǵy jalǵyz aýrýhanany jabýǵa týra keledi. Kóptegen oblystarda densaýlyq saqtaý nysandarynyń tozyǵy jetti, eskirdi. Bir ǵana Almaty oblysynda 60-tan astam nysanǵa kúrdeli jóndeý júrgizý qajet, oǵan jetkilikti qarajat bólingen joq», - dedi ol.
Onyń aıtýynsha, qoǵamdyq densaýlyq saqtaý komıtetine densaýlyq saqtaý nysandaryn tekserýdi kúsheıtý jóninde tapsyrma berilgen.
«Talapqa saı kelmegen meıramhanalardy jabamyz da, emhanalardy qaldyramyz ba? Eger adam ómirine qaýipti bolsa, ınfektsııa oshaǵy tabylsa ne bolmaq? Bul baǵyttaǵy jumysty kúsheıtý kerek», - dedi Eljan Birtanov.
