Qazaqstanda dári-dármekti 100 kúnnen aspaıtyn merzimde tirkeıtin joba iske qosyldy
ASTANA. KAZINFORM – Qazaqstanda dárilik zattar men medıtsınalyq buıymdardy «bir tereze» qaǵıdaty boıynsha 100 jumys kúninen aspaıtyn merzimde tirkeý jónindegi pılottyq joba iske qosyldy.
Bul joba memlekettik qyzmetterdi reınjınırıngteý jáne densaýlyq saqtaý salasyn tsıfrlandyrý bastamalary sheńberinde, Tsıfrlyq damý mınıstrligi men Densaýlyq saqtaý mınıstrliginiń ózara is-qımyly arqyly júzege asyrylyp otyr.
Jańa tásil ónimderdiń naryqqa shyǵý merzimin edáýir qysqartyp, qaıtalanatyn ákimshilik rásimderdi joıýǵa múmkindik beredi. Qazirgi tańda dári-dármekterge saraptama júrgizý 210 kúnge deıin, baǵa qalyptastyrý – 60 jumys kúnine deıin, al kásibı saraptama – 50 jumys kúnine deıin sozylýy múmkin, kompozıttik memlekettik qyzmetti qoldaný arqyly bul protsester biriktirilip, parallel túrde 100 jumys kúninen aspaı ótetin bolady.
Kompozıttik memlekettik qyzmet erikti ári balamaly negizde engiziledi jáne qoldanystaǵy saraptama, tirkeý jáne baǵa belgileý mehanızmderimen qatar qoldanylady, sonymen qatar, bul qyzmet dárilik zattardy Qazaqstannyń ulttyq dárilik formýlıaryna engizý úshin kásibı saraptamadan ótkizýdi de qarastyrady.
Sondaı-aq kompozıttik memlekettik qyzmet Dúnıejúzilik densaýlyq saqtaý uıymymen birlesken tirkeý rásimin júrgizýdi kózdegen. Bul – dárilik preparattardy aldyn ala biliktendirý jáne AQSh, Eýropalyq odaq, Ulybrıtanııa, Japonııa sııaqty qatań retteý júıesi bar elderdiń retteýshi organdary tarapynan taný tártibi sheńberinde júzege asady jáne 15 jumys kúninen aspaıdy.
Osyndaı jedeldetilgen merzimder tanylǵan retteýshi júıeleri bar elderde óndirilgen medıtsınalyq buıymdarǵa da qoldanylatyn bolady.
Sonymen qatar, kompozıttik qyzmettiń sheńberinde óndirýshi baǵasyn tirkeý, kóterme jáne bólshek saýdada satylǵan kezdegi ústeme baǵalardy avtomatty túrde esepteý kózdelgen, bul – TMKKK jáne MÁMS sheńberinde iske asyrylady.
Pılottyq joba bıylǵy 1 shildege deıin jalǵasady. Eger onyń tıimdiligi rastalsa, kompozıttik qyzmet kórsetýdiń turaqty modeline kóshý jáne qoldanystaǵy normatıvtik talaptardy joıý josparlanýda. Bul – dárilik zattardyń naryqqa jyldam shyǵýyn qamtamasyz etetin mańyzdy qadam bolmaq.
Aıta keteıik, EAEO dári-dármekterdi ulttyq qaǵıdalar boıynsha tirkeýdi 2027 jyldyń sońyna deıin uzartty.