Qazaqstanda dári-dármek saqtaıtyn jańa qoımalar salynady
ASTANA. KAZINFORM – Qazaqstanda dárilik zattar men medıtsınalyq buıymdardy saqtaýǵa arnalǵan jańa qoımalar salynady. Bul týraly QR Densaýlyq saqtaý vıtse-mınıstri Tımýr Muratov OKQ alańynda ótken baspasóz konferentsııasynda málim etti.
Onyń aıtýynsha, qazirgi ýaqytta dári-dármekpen qamtamasyz etý júıesiniń tıimdiligin arttyrý jáne qoıma jaldaýǵa ketetin shyǵyndy azaıtý baǵytynda jumystar júrgizilip jatyr.
– Osyǵan baılanysty Aqtóbe, Astana, Almaty, Shymkent, Aqtaý jáne Semeı qalalarynda menshikti qoımalar salý josparlanyp otyr, - dedi Tımýr Muratov.
Vıtse-mınıstrdiń sózinshe, dárilik zattardy satyp alý protsesiniń ashyqtyǵyn kúsheıtý úshin logıstıkalyq jáne fýnktsıonaldyq baqylaýdyń 40 parametri engizilgen. Sonyń 15 parametri 2024-2026 jyldar aralyǵynda iske qosylǵan.
Ol bul sharalar dári-dármek satyp alý júıesin tıimdi etýge jáne halyqty qajetti preparattarmen turaqty qamtamasyz etýge múmkindik beretinin atap ótti.
Aıta keteıik, buǵan deıin Qazaqstanda tegin dári-dármekpen qamtylatyndar sany 3,4 mln adamǵa jetkeni habarlanǵan edi.
