Qazaqstanda tsıfrlyq kodeks qabyldanýy múmkin
«Zańnamany qaıta qaraýdyń kelesi kezeńi birshama qıynǵa soǵady. Bul jerde barlyq salalyq memlekettik organdar qatysýy qajet. Olar óz ustanymyn qaıta qaraýy tıis. Búkil protsesterdi birdeı túsinip, sheshim qabyldaıtyn ámbebap maman joq. Árıne, reınjınırıngpen aınalysatyn tehnıkter jalpy bıznes-protsesti túsinedi, biraq jumys ádisnamasy sala mamandaryna ǵana aıan», - dedi QR Parlamenti Májilisiniń depýtaty Ekaterına Smyshlıaeva «AMANAT» partııasy alańynda ótken baspasóz máslıhatynda.
Onyń aıtýynsha, árbir memlekettik organ kórsetetin qyzmettiń mobıldi, ashyq jáne qoljetimdiligine taldaý júrgiziledi.
«Depýtattyq korpýstyń mindeti - nátıjeli sheshimderdi qoldaý jáne zań sórede jatpaı, adamdardyń ıgiligine jaraýyn qamtamasyz etý. Tsıfrlandyrý jónindegi zań shyǵarý protsesi qazir qyzý qarqynmen júrip jatyr. Bir zań qabyldansa, az ýaqyttan soń qaıta ózgeris engizý kerek bolady. Osylaısha bizge 1-2 jyldan keıin tsıfrlyq kodekstiń qajettigi kórinip tur. Kodeks biz ázirlenip jatqan búkil normalarymyzdy biryńǵaı júıege jınaqtaıdy jáne ortaq quqyqtyq alańda jumys isteıtin bolady», - deıdi ol.
Aıta ketsek, 15 shilde kúni Memleket basshysy tsıfrlandyrý, aqparattyq qaýipsizdikti damytý máseleleri boıynsha ózgeris engizý týraly Zańǵa qol qoıdy.
Buǵan deıin habarlaǵanymyzdaı, jańa zań aıasynda qazaqstandyqtar endi barlyq jerde jeke kýáliktiń elektrondy nusqasyn qoldana alady.
Sondaı-aq, mınıstrlik ókili qazaqstandyqtarǵa úıdegi ınternet operatoryn tańdaý múmkindigi beriletinin aıtty.
Odan bólek, EgovMobile arqyly alýǵa bolatyn qujattar sanynyń kóbeıgenin habarlaǵan edik.
