Qazaqstanda byltyr qalyptasqan ınflıatsııa deńgeıi - sońǵy 15 jyldaǵy eń tómengi kórsetkish

ASTANA. 15 qańtar. QazAqparat - Byltyr ınflıatsııa deńgeıi 4,8 paıyzdy qurady (2012 jylǵy jeltoqsan men 2013 jeltoqsan aralyǵy). Inflıatsııanyń bul deńgeıi - 15 jyldaǵy eń tómengi kórsetkish. Bul týraly búgin Astanada ótken baspasóz máslıhatynda QR Statıstıka agenttiginiń tóraǵasy Álıhan Smaıylov málim etti.

Onyń sózine qaraǵanda, bundaı kórsetkish áleýmettik mańyzdy taýarlarǵa baǵa boıynsha jyl boıy Úkimetpen jáne jergilikti atqarý organdarymen ýaqytyly qabyldanǵan tejeýish sharalardyń arqasynda múmkin boldy. Sonymen qatar Úkimet retteletin turǵyn úı kommýnaldyq qyzmetterge tarıf ósimin ustap turý turǵysynda jumystar júrgizdi.

Sonymen qatar agenttik basshysy keıbir taýarlarǵa baǵanyń joǵary ósimi baıqalsa, keıbireýlerine ortasha bolǵanyn, sondaı-aq birqatar taýarlardyń baǵasy tómendegenin atap ótti.

Budan buryn habarlanǵandaı, 2013 jyldyń aldyn ala qorytyndysy boıynsha elimizdegi jalpy ishki ónimniń ósimi 6 paıyzdy qurady.