Qazaqstanda bıznesti josparly tekserý eki ese azaıady – Álibek Qýantyrov

Keıingi 5 jylda ishki jalpy ónimdegi shaǵyn jáne orta bıznes úlesiniń turaqty ósýi baıqalyp otyr. Bul týraly Ulttyq ekonomıka mınıstri Álibek Qýantyrov aıtty, dep habarlaıdy Kazinform. 

«2019-2023 jyldar aralyǵynda qazaqstandyq shaǵyn jáne orta kásipkerliktiń ekonomıkaǵa qatysýy úlesi 31,7 paıyzdan 36,4 paıyzǵa deıin, ıaǵnı 4,7 paıyzdyq tarmaqqa ósti. 2023 jyly jumyspen qamtylǵandardyń jalpy sany 23,8 paıyzǵa ósip, 4,2 mln adamǵa jetti», - dedi Á. Qýantyrov Senatta «Qazaqstan Respýblıkasynda shaǵyn jáne orta kásipkerlikti damytý» taqyrybynda ótip jatqan Úkimet saǵatynda.

Mınıstrdiń aıtýynsha, bıylǵy 1 qazandaǵy jaǵdaı boıynsha tirkelgen shaǵyn jáne orta bıznes sýbektileriniń jalpy sany 2,2 mln. Onyń 99,9 paıyzy shaǵyn kásipkerlik, qalǵan 0,1 paıyzy orta kásipkerlik sýbektisi.

«Kásipkerlik belsendilik deńgeıi 89,7 paıyzǵa jetti. Bul kórsetkish jalpy tirkelgen kásipkerlik sýbektileri arasynda jumys istep turǵandarynyń úlesin bildiredi. Bul rette, orta kásipkerlik sýbektileri arasyndaǵy belsendilik shaǵyn kásipkerlikke qaraǵanda 6,7 paıyzdyq tarmaqqa joǵary», - dedi vedomstvo basshysy.

Sonymen qatar ol elde úsh jyl boıy shaǵyn jáne mıkrobızneske tekserý jasaýǵa moratorıı qoldanylyp kele jatqanyn eske saldy.

«Budan bólek, «taza paraqtan retteý» qaǵıdaty sátti engizilip jatyr. 10 myńnan astam ózekti emes talap anyqtaldy. Onyń 9 myńy zańǵa táýeldi qujat deńgeıde alynyp tastaldy, al qalǵandary Parlamenttegi zań jobasy aıasynda jyl sońyna deıin joıylady. Sondaı-aq táýekelderdi basqarý júıesi (TBJ) avtomattandyrylady, ol 2024 jylǵy 1 qańtardan bastap adamnyń qatysýynsyz tekserýlerdi belgileýge múmkindik beredi. Bul turǵyda bıznesti josparly tekserý 2 ese jáne aıyppuldar sany birneshe ese azaıady», - dedi Álibek Qýantyrov.

Budan buryn habarlanǵandaı, Senat tóraǵasy Máýlen Áshimbaev shaǵyn jáne orta bızneske ákimshilik júktemeni azaıtýdy jalǵastyrý kerek ekenin aıtty.