Qazaqstanda bıznes kredıtke kepildik beretin qor jumysyn bastady

ASTANA. KAZINFORM – Búgin «Damý» qory jańa «Kepildik qory» aıasynda alǵash kepildigin berdi. Bul týraly Ulttyq ekonomıka mınıstrligi habarlaıdy.

«Damý» Qory bazasynda shaǵyn jáne orta bıznes pen iri bıznestiń jobalaryn nesıeleý úshin «Kepildik qoryn» iske qosty. Ony Jambyl oblysynda «Asatu» brendimen makaron ónimderin shyǵaratyn Oleg Pankeev paıdalandy. Qarajatty kásipker jabdyq satyp alý jáne óndiris-qoıma ǵımaratyn salýǵa jumsamaq. 

— Qordyń jańa kepildiginiń arqasynda biz jańa tseh salý úshin tıimdi sharttarmen qarjy ala aldyq. Bul bizdiń bıznes úshin mańyzdy qoldaý jáne qarajat alý protsesi áldeqaıda jeńil jáne jyldam ótti. Sonymen qatar bul joba jumys oryndaryn ashýǵa túrtki bolyp, óńir ekonomıkasy damýyna yqpal etedi, — deıdi kásipker Oleg Pankeev.

Dál qazir ekinshi deńgeıli banktermen kepildik qoryna qatysý týraly kelisimderge qol qoıyldy. 

Shaǵyn jáne orta bızneske kepildik qory Úkimet, ekinshi deńgeıli bankter jáne ózge de ınvestorlarmen birlesip qurylady. Ol — kásipkerdiń kepilzaty jetkiliksiz bolǵan jaǵdaıda 7 mlrd teńgege deıin nesıe alýyna múmkindik jasaıdy. Bul qural qoldaý kútetin jobalar kóleminiń respýblıkalyq jáne jergilikti bıýdjetterden bólinetin qarajatqa táýeldiligin azaıtýǵa sep bolmaq.

Baǵdarlamaǵa salyq nemese de nesıe túrindegi qaryzdary joq, jumys istep turǵan mıkro, shaǵyn, orta jáne iri bıznes sýbektileri qatysa alady. Onyń aıasynda shaǵyn jáne orta bıznes sýbektileri 7 mıllıard teńgege deıingi qaryzǵa nesıe somasynyń 85%-na deıin, biraq 3,5 mlrd teńgeden aspaıtyn kepildik ala alady. Іri bıznes úshin quny 7 mlrd teńgeden bastalatyn jobalar úshin kepildiktiń maksımal mólsheri — joba qunynyń 30%-na deıingi soma bolmaq.

Kepildik alý úshin kásipker tikeleı bankke júginýi qajet. 

Eske sala ketsek, bir aı buryn elimizde shaǵyn, orta jáne iri bıznes úshin beriletin kredıtke kepildik beretin birneshe qor qurylatyny týraly habarlaǵan edik.