Qazaqstanda bir dárigerge túsetin júkteme azaıtylýda
Aıta keteıik, 15 qyrkúıekten Qazaqstanda emhanaǵa tirkelý bastaldy. Eki aıǵa sozylatyn jyl saıynǵy dástúrli naýqan 15 qarashada aıaqtalady.
«Mundaǵy maqsat - qaralyp júrgen emhanasyna kóńili tolmaıtyn azamattarǵa emdeý mekemesin aýystyrýǵa múmkindik berý. Sondaı-aq, bul shara naryqqa jańadan qosylǵan medıtsına uıymdarynyń keler jyly halyqqa qyzmet kórsetýge tapsyrys alýyna jaǵdaı jasaý maqsatynda ótkiziledi, - dedi Áleýmettik medıtsınalyq saqtandyrý qory basqarma tóraǵasynyń mindetin atqarýshy Botagóz Jaqselekova.
Onyń sózine qaraǵanda, byltyrǵy tirkeý naýqany barysynda 300 myńnan astam qazaqstandyq azamat emhana tańdaý quqyǵyn paıdalanǵan bolatyn. Bul aldyńǵy jyldardaǵy kórsetkishterden eki ese kóp. Sonymen qatar, tirkeý kampanııasyna degen qyzyǵýshylyqtyń artqanyn, azamattardyń atalǵan naýqan týraly ǵana emes, emhanany erkin tańdaý quqyǵy jaıly da bile bastaǵanyn baıqaýǵa bolady.
Otbasylyq qyzmet kórsetý jáne medıtsınalyq-sanıtarlyq kómektiń qoljetimdiligi ustanymdaryn iske asyrý úshin emhananyń úıge jaqyn mańda bolǵany durys. Bul úıde bireý aýyryp, ózin jaısyz sezingen jaǵdaıda dárigerlerdiń jedel kómek kórsetýine múmkindik beredi. Budan bólek, jedel járdem júıesinde jasalǵan sońǵy reformalardy eskersek, munyń mańyzy arta túsedi. Sebebi budan bylaı 4-sanatqa jatqyzylatyn shaqyrtýlarǵa jergilikti emhanalar qyzmet kórsetedi.
Oǵan qosa, dárigerlerge túsetin júkteme men emhanalardaǵy kezekti azaıtý maqsatynda tirkeý shegi belgilenip otyr. Ol boıynsha bir jalpy praktıka dárigerine tirkeletin adam sany 1700-den aspaýy tıis. Buryn bizde bir dáriger 2000 adamǵa qyzmet kórsetetin.
«Azamattar úsh túrli jolmen, ıaǵnı, tańdap alǵan medıtsına uıymyna tikeleı baryp, elektrondy úkimet portaly arqyly onlaın rejiminde jáne Halyqqa qyzmet kórsetý ortalyqtary arqyly tirkele alady», - dedi MSQ medıtsınalyq kómekti paıdalanýshylarmen jumys jáne memlekettik organdarmen baılanys jónindegi basqarýshy dırektory Zabıra Orazalıeva.
Emhana arqyly tirkelý úshin jeke kýálik pen bas dárigerdiń atyna jazylǵan ótinish talap etiledi. Al, egov.kz portaly arqyly tirkelý úshin júıege kirip, elektrondy ótinimdi toltyrasyz. Qyzmettiń nátıjesi ótinish berýshiniń Jeke kabınetine joldanady. Halyqqa qyzmet kórsetý ortalyqtary arqyly tirkelý úshin Connection Points bóliminiń qyzmetin paıdalanýǵa bolady.
Halyqty tirkeýmen aınalysatyn emhanalardyń tizimi Áleýmettik medıtsınalyq saqtandyrý qorynyń fms.kz saıtyndaǵy «Klınıka tańdaý» bóliminde ornalasqan. Bıylǵy tirkeý naýqanyna bastapqy medıtsınalyq-sanıtarlyq kómek kórsetetin 580 uıym qatysyp jatyr.