Qazaqstanda bazalyq mólsherleme 9% deıin tómendedi
Osylaısha ótimdilikti usyný boıynsha turaqty qol jetkizý operatsııalary boıynsha mólsherleme 10,5% jáne ótimdilikti alý boıynsha turaqty qol jetkizý operatsııalary boıynsha mólsherleme 7,5% bolady.
«Bazalyq mólsherlemeniń tómendeýi aǵymdaǵy jylǵy mamyr-maýsymdaǵy boljamdyq raýnd sheńberinde kútilgenge qaraǵanda 2020 jylǵy birinshi jartyjyldyqta proınflıatsııalyq táýekelderdiń álsireýine jáne ekonomıkalyq belsendiliktiń barynsha kúshti qysqarýyna negizdeldi. Karantındi qatańdatý boıynsha qabyldanǵan sharalar qosymsha dezınflıatsııalyq áser etedi. Bul rette bazalyq ınflıatsııa (trimmed mean) jáne 2020 jylǵy maýsymdaǵy medıandyq ınflıatsııa barynsha qalypty serpindi, tıisinshe 6,1%-dy jáne 4,4%-dy kórsetedi. Jyl basynan bastap birtindep jedeldeýdi (2019 jylǵy jeltoqsanda – tıisinshe 5,2% jáne 4,3%) atap ótken jón, biraq, bul rette, bazalyq ınflıatsııa kórsetkishteri ınflıatsııanyń monetarlyq quraýyshynyń barynsha qalypty ósýi týraly belgi bere otyryp, jalpy ınflıatsııadan baıaý ósedi» dep málim etti Ulttyq bank.
Dollarlandyrýdyń ósý táýekelderi aıtarlyqtaı tómendedi, bul mólsherlemeni tómendetý úshin áleýetti keńeıtti. Teńge aktıvterin qorǵaý boıynsha jedel sharalar nátıjesinde aǵymdaǵy jylǵy 6 aıdyń qorytyndysy boıynsha depozıtterdi dollarlandyrý aldyn ala derekter boıynsha 43,1%-dan 40,0%-ǵa deıin tómendedi, bul bazalyq mólsherlemeni tómendetý múmkindigine de yqpal etedi.
Dálizdiń tarylýy qarjy naryǵyndaǵy ahýaldyń turaqtanýynan jáne ekonomıkanyń jańa jaǵdaılarǵa birtindep beıimdelýinen týyndady. Bul sheshim aqsha naryǵynyń mólsherlemelerin bazalyq mólsherlemege jaqyndatýǵa múmkindik beredi, aqsha naryǵy mólsherlemeleriniń qubylmalylyǵyn tómendetýdi qamtamasyz etedi jáne naryqqa qatysýshylarda barynsha turaqty kútýlerdi qalyptastyrýǵa yqpal etedi.
Bazalyq mólsherlemeniń jańa deńgeıi kredıtterdiń qunyn tómendete otyryp, ósirilgen kredıttik táýekelderdi belgili bir dárejede óteýge múmkindik beredi.
Bul sheshim Qazaqstan ekonomıkasyna karantındi kúsheıtý jónindegi sharalar saldarynyń yqpalyn retteýge múmkindik beredi jáne Qazaqstan ekonomıkasynyń ósýin qalpyna keltirý protsesin qoldaıdy.
