Qazaqstanda bar-joǵy 281 revmatolog bar – professor Ǵalymjan Toǵyzbaev
ALMATY. KAZINFORM – Almatyda APLAR-2024 Sımpozıýmy (mid-term Symposium APLAR-2024) jáne Qazaqstan revmatologtarynyń 7-shi kongresi ótip jatyr.
Sharaǵa Japonııa, Sıngapýr, Gonkong, Taıvan, Bangladesh, Úndistan, Fılıppın, Katar, Qytaı, Taıland, Avstralııa, Kanada, Ulybrıtanııa, Kolýmbııa, Germanııa, Reseı, Ózbekstan, Qyrǵyzstan, Tájikstan jáne Qazaqstannyń revmatologııa salasyndaǵy jetekshi sarapshylary qatysýda. Uıymdastyrýshylardyń sózinshe, sımpozıým revmatoıdty artrıt, spondıloartrıt, vaskýlıt, osteoporoz, mıkrokrıstaldy artrıt jáne t.b. qosa alǵanda, revmatıkalyq aýrýlardy emdeý máselelerin talqylaýǵa arnalǵan alań bolmaq.
Búgingi is-shara Qazaqstanda alǵash ret ótip otyr. Bul týraly Qazaqstan revmatologtar alqasynyń tóraǵasy, professor Ǵalymjan Toǵyzbaev aıtty.
«Álemniń 20 elinen myqty mamandary kelip otyr. Sharanyń maqsaty halqymyzdyń jaǵdaıyn jaqsartý, aýrýlardy erte anyqtaý, durys emdeýge qatysty bolyp jatyr. Biz negizi Qazaqstanda Úkimettiń qaýlysymen Ulttyq ǵylymı ortalyqty ashýymyz kerek. Ony Asfendııarov atyndaǵy Qazaq ulttyq medıtsınalyq ýnıversıtetimen birlese otyryp, isteýimiz kerek. Osy jáne basqa da máselelerdi biz búgingi jıynda talqylap jatyrmyz, sol sebepti bul jıyn óte mańyzdy. Sonymen qatar, bolashaqta birlese ǵylymı jobalar jasaý, adamdarǵa kómek berý, býyn aýrýy bar adamdardy emdeý sekildi máselelerdi kóterip jatyrmyz. Jalpy, elimizde búgin bolyp jatqan jaǵdaı da kúrdeli másele bolyp tur. Osyǵan oraı aýrýlardy erte anyqtap, erterek em dom jasap, halyqqa kómek kórsetý máselesi de kóterilýde», - dedi Ǵalymjan Toǵyzbaev.
Onyń aıtýynsha, revmatızm aýrýy ınfektsııa, tuqym qýalaý, stressten paıda bolýy múmkin.
«Qazirgi tańda tek qart adamdar ǵana emes, jastarda, ásirese, jas qyz, kelinshekterde kóptep kezdesip jatady. Elimizde búgingi kúni revmatıkalyq aýrýlarmen 400 myńnan astam adam aýyrady. Ol resmı statıstıka. Sol sebepti biz ǵylymı epıdemıologııalyq jobalardy, ǵylymı zertteýlerdi jasaýymyz kerek. Sony da búgin talqyladyq», - dedi spıker.
Professor Ulttyq ǵylymı ortalyqty ashý jóninde Densaýlyq saqtaý mınıstrligimen birlese jumys jasalyp jatqanyn atap ótti.
«Ǵylymı ortalyqty bir jyldyń ishinde ashsaq pa degen nıetimiz bar. Osyǵan oraı, qazir birqatar máseleler bar, biz olardy Densaýlyq saqtaý mınıstrligimen birlese sheshýimiz kerek. Ol Ǵylymı ortalyq Asfendııarov ýnıversıtetiniń janynan ashylatyn bolady», - dedi ol.
Qazaqstanda revmatolog mamandardyń jetispeýshiligi bar.
«Bizde emdeıtin zamanaýı tehnologııalar bar. Sondaı-aq memletket tarapynan halyqqa kóptegen dáriler tegin beriledi. Árıne, bul maqtanarlyq jaǵdaı emes. Biz áli de sońǵy úlgidegi zamanaýı tehnologııalardy engizýimiz kerek. Jalpy, elimizde revmatolog mamandardyń jetispeýshiligi bar, ol 40% quraıdy. Desek te, jyl saıyn revmatologtardy kóbeıtip jatyrmyz. Mysaly, 2010 jyly Qazaqstanda 78-aq revmatolog bolǵan. Bıylǵy jyldyń esebi boıynsha Qazaqstanda 281 revmatolog bar. Ol áli de jetkiliksiz. Sol sebepti elimizde revmatologtardyń sanyn kóbeıtý jumystaryn júrgizip jatyrmyz», - dedi Qazaqstan revmatologtar alqasynyń tóraǵasy, professor Ǵalymjan Toǵyzbaev.
