Qazaqstanda bank aktıvteriniń sapasyna keshendi táýelsiz baǵalaý júrgiziledi
Bul týraly Úkimettiń keńeıtilgen otyrysynda QR Ulttyq banki tóraǵasy Erbolat Dosaev málimdedi.
«Tekserýge bank júıesindegi barlyq aktıvtiń 87% quraıtyn 14 bank engizilgen. Bıylǵy shilde aıynyń sońyna deıin halyqaralyq konsýltant - Oliver Wyman kompanııasymen birlesip, Eýropa ortalyq bankiniń ádistemesin beıimdeý jumysyn aıaqtaımyz», - dedi Erbolat Dosaev.
Memleket basshysy Qasym-Jomart Toqaev 14 bankke qatysty jumystyń qalaı júrgiziletinin surady.
«Bul – sheteldik qatysýshylary bar qazaqstandyq bankter. Eýropa ortalyq bankiniń ádistemesin beıimdeý jumysy 29 shildege qaraı aıaqtalady. 1 tamyzdan bastap bank aktıvterin baǵalaýǵa kóshemiz. Bul jumys bıyl qarashanyń sońynda nemese jeltoqsan aıynyń basynda aıaqtalady. Ári qaraı Úkimetpen birlesip, bank aktıvterin baǵalaý qorytyndysy boıynsha sharalar men usynymdardy eskerip, aldaǵy 2-3 jylda ótkizetin sharalardyń arnaıy josparyn quramyz. Bank aktıvterin baǵalaý ınvestor tartýǵa jáne Qazaqstannyń bank júıesiniń bedeli men senimin arttyrýǵa múmkindik beredi dep esepteımiz», - dedi ol.
Aıta keteıik, elordada QR Prezıdenti Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrlikterdiń basshylary qatysýda.
