Elimizde balyq sharýashylyǵy qyzmetkerleriniń kásibı merekesi atalyp ótti
ASTANA. KAZINFORM — Qazaqstanda balyq sharýashylyǵy qyzmetkerleriniń kásibı merekesi – Balyq sharýashylyǵy qyzmetkerleri kúni saltanatty túrde atalyp ótýde.
Bul sala elimizdiń áleýmettik-ekonomıkalyq damýynda mańyzdy ról atqaryp, azyq-túlik qaýipsizdigin qamtamasyz etýge, halyqty jumyspen qamtýǵa jáne sý bıologııalyq resýrstaryn tıimdi ári utymdy paıdalanýǵa úles qosyp otyr.
Búginde merekelik is-sharalar eldiń barlyq óńirlerinde ótkizilýde.
Balyq sharýashylyǵy salasynyń eńbekkerlerin quttyqtaý úshin Atyraý oblysyna aýyl sharýashylyǵy vıtse-mınıstri Amanǵalı Berdalın arnaıy baryp, QR Premer-Mınıstri Oljas Bektenovtyń sala ardagerleri men qyzmetkerlerine arnaǵan quttyqtaýyn oqyp berdi. Salada adal eńbegimen kózge túsken úzdik mamandar vedomstvolyq marapattarǵa ıe boldy.
Batys óńiri boıynsha 3 adam «Balyq sharýashylyǵy salasynyń eńbek sińirgen qyzmetkeri» qurmetti ataǵymen, 8 adam «Balyq sharýashylyǵy salasyndaǵy minsiz qyzmeti úshin» tósbelgisimen, al 11 adam Aýyl sharýashylyǵy mınıstriniń Qurmet gramotasymen marapattaldy.
Jalpy respýblıka boıynsha 13 adam «Balyq sharýashylyǵy salasynyń eńbek sińirgen qyzmetkeri» qurmetti ataǵyna, 21 adam «Balyq sharýashylyǵy salasyndaǵy minsiz qyzmeti úshin» tósbelgisine, 25 adam Aýyl sharýashylyǵy mınıstriniń Qurmet gramotasyna ıe boldy.
Sonymen qatar, vıtse-mınıstr Jaıyq-Kaspıı balyq ınspektsııasynyń Damba bóliminiń jańa angaryn ashý saltanatyna qatysyp, ınspektsııaǵa arnap satyp alynǵan jańa avtokólikter men arnaıy tehnıkanyń kiltterin tabystaý rásimine qatysty.
Kásibı merekeni merekeleý aıasynda óńirde sporttyq-áýesqoılyq balyq aýlaý jarystary, jergilikti óndirýshilerdiń ónimderi qoıylǵan jármeńke, qaıyqtar parady jáne bekire tuqymdas balyq shabaqtaryn tabıǵı sý aıdyndaryna jiberý sharasy uıymdastyryldy.
Aıta keteıik, búginde elimizde balyq sharýashylyǵy salasynda jumys isteıtin 8 óńiraralyq basseındik ınspektsııa men basqa da uıymdarda 12 myńnan astam adam eńbek etedi. Jalpy kólemi 3 mln gektardan asatyn sý aıdyndarynda 70-ten astam balyq túri mekendeıdi. Balyq sharýashylyǵymen aınalysatyn 1340 sýbekt óz qyzmetin atqaryp júr
2021–2024 jyldar aralyǵynda salaǵa 45 mıllıard teńgeden astam ınvestıtsııa tartylǵan. Jyl saıyn elimizdiń balyq sharýashylyǵy sý aıdyndarynan 45 myń tonnadan astam balyq aýlanady, onyń basym bóligi Atyraý, Almaty, Shyǵys Qazaqstan jáne Qyzylorda oblystaryna tıesili.
Brakonerlikpen kúres te basty nazarda. Sońǵy jyldary ınspektsııalardyń materıaldyq-tehnıkalyq bazasyn nyǵaıtýǵa 1,5 mıllıard teńge bólinip, 47 avtokólik pen 10 sý kóligi satyp alyndy.
Akvamádenıet salasy da turaqty ósim kórsetýde. Sońǵy bes jylda ósiriletin balyq kólemi 2,6 esege artyp, 6,9 myń tonnadan 18,2 myń tonnaǵa jetti. Qazirgi tańda elde 600-den astam balyq ósirý sharýashylyǵy jumys isteıdi, onda shamamen 2 myń adam jumyspen qamtylǵan. Bul baǵytta Túrkistan, Jambyl, Almaty jáne Shyǵys Qazaqstan oblystary kósh bastap tur. Sharýashylyqtarda sazan, tuqy, aq amýr, dóńmańdaı, bekire tuqymdastar, forel, pelıad, jaıyn jáne tılapııa sııaqty balyq túrleri ósiriledi.
Elimizde jalpy qýattylyǵy jylyna 100 myń tonnadan asatyn 72 balyq óńdeý kásiporny jumys isteıdi. Olardyń 20-sy ónimin Eýropalyq odaq elderine eksporttaýǵa beıimdelgen. 2024 jyly elimizden 23,4 myń tonna balyq ónimi eksporttalyp, 74,7 mıllıon AQSh dollary.