Qazaqstanda balyq aýlaýǵa lımıt qoıyldy

ASTANA. KAZINFORM – Aýyl sharýashylyǵy mınıstrligi 2025 jylǵy 1 shilde men 2026 jylǵy 1 shilde aralyǵynda balyq jáne basqa da sý janýarlaryn aýlaýǵa lımıtti bekitý týraly qaýlyǵa ózgerister men tolyqtyrýlar engizdi. Qujat jobasy «Ashyq NQA» portalynda jarııalandy. 

Balyq aýlaý shegi kelesi ózender men sý qoımalarynda qoıyldy:

- Jaıyq-Kaspıı basseıninde Atyraý, Batys Qazaqstan jáne Mańǵystaý oblysynyń aýmaǵynda balyq aýlaý lımıti – 51 267,6 tonna. Bul kólemge bekire tuqymdas balyqtarǵa qatysty, ıaǵnı qorytpa, orys bekiresi, súırik, pilmaı, shoqyr, sondaı-aq kókserke, sazan, shortan, aq amýr, aqmarqa jáne basqa balyq túri bar;

- Almaty, Qaraǵandy jáne Jambyl oblystarynyń aýmaǵyndaǵy Balqash kólinde balyq aýlaý lımıti – 10 008 tonna. Aýlaýǵa bolatyn balyqtar qatarynda taban, kókserke, kókjarǵan, shabaq, jaıyn, jylanbalyq jáne qarabalyq bar;

- Іle ózeni men oǵan irgeles sý aıdyndarynda balyq aýlaýǵa ruqsat etilgen lımıt — 152,47 tonna. Atap aıtqanda, taban, kókserke, kókjarǵan, shabaq, jaıyn, qarabalyq, aq amýr, jylanbalyq, berish, sazan, móńke, aqmarqa kiredi;

- Alakól júıesine kiretin Alakól, Qoshqarkól jáne Sasyqkól kólinde 1451,7 tonna kóleminde balyq aýlaýǵa ruqsat berildi. Munda taban, alabuǵa, qarabalyq, qyzylqanat, sazan jáne shaıandar bar;

- Qapshaǵaı sý qoımasynda balyq aýlaý lımıti 1399,6 tonna bolyp belgilendi. Onda taban, kókserke, sazan, kókjarǵan, jaıyn, aq amýr, aqmarqa, shabaq, qarabalyq, jylanbalyq mekendeıdi;

- Shyǵys Qazaqstan jáne Abaı oblysynyń aýmaǵyndaǵy Buqtyrma sý qoımasynda 3160,5 tonna balyq aýlaýǵa bolady. Munda taban, qyzylqanat, alabuǵa, kókserke, shortan, paıdabalyq, kókshubar, móńke, sazan jáne basqa da túrler kezdesedi.

Sondaı-aq lımıt kelesi sý aıdyndary úshin de belgilendi:

- Jaısan kóli;

- Ertis ózenindegi Shúlbi sý qoımasy;

- Óskemen sý qoımasy;

- Ertis ózeni;

- Aral teńizi (úlken jáne kishi);

- Syrdarııa ózeni;

- Shardara sý qoımasy;

- Esil ózeni;

- Sileti ózeni;

- Tobyl ózeni;

- Nura ózeni;

- Qanysh Sátbaev atyndaǵy kanal;

- Óńirlik mańyzy bar balyq sharýashylyǵy sý aıdyndary.

Aıta ketsek, baǵaly shaıan aýlaıtyn pavlodarlyq kásipkerler lımıtsiz qalýy múmkin máselesin kótergen edik. 

Ótken aıda Atyraýda Jaıyq ózenine bekireniń 2,1 mln shabaǵy jiberildi.