Qazaqstanda balalar lagerine joldama quny qansha
Jeke jáne memlekettik lagerge joldama quny elimizde 350 myń teńgege deıin jetti. Keı óńirde memlekettik lagerlerde demalý tegin, dep habarlaıdy Kazinform agenttiginiń tilshisi.
Jazǵy demalys kezinde mektep janyndaǵy lagerler de jumys isteıdi. Ata-analar tek balanyń tamaǵyna aqy tóleıdi. Lagerdiń bir maýsymy 15 kúnge sozylady. Tek qosymsha shyǵynǵa daıyn bolǵan abzal. Kún saıyn mýzeıge, kınoteatrǵa jáne ózge de sharalarǵa aqsha suraýy múmkin.
Sholý kezinde qala syrtyndaǵy lagerlerde tynyǵý, demalysty qyzyqty ótkizý qunyn bildik. Lagerler qala syrtynda ornalasqan. Demalys 10 kúnge sozylady. Degenmen keıbir lagerde ekskýrsııa aqyly bolyp tur. Bul týraly lagerge barmas buryn surap bilgen abzal.
Elimiz boıynsha eń arzan joldama Qaraǵandy oblysynda satylady. Munda baǵa – 15 000 men 75 000 teńge aralyǵynda. Áleýmettik jaǵynan az qamtylǵan otbasy balalaryna joldama tegin beriledi. Al jeke lagerler Qarmet korporatsııasynyń qoldaýyna ıe.
Odan keıingi orynda Qostanaı oblysy tur. Munda joldama quny 18 myń teńgeden bastalady. Atyraý men Batys Qazaqstan oblystarynda baǵa – 25 000 teńge jáne odan joǵary.
Soltústik Qazaqstan oblysynda joldama quny – 35 000 - 60 000 teńge aralyǵynda. Pavlodarda baǵa 36 000 teńgeden bastalyp, 125 000 teńgege deıin jetti. Baıanaýyl aýdanyndaǵy saýyqtyrý ortalyǵynyń quny ózgelerge qaraǵanda joǵary.
Aqmola men Qyzylorda oblystarynda eń arzan joldama quny 40 000 teńgeden bastalady. Keıbir óńirde balalardy lagerge tasymaldaý úshin qosymsha aqy suraıdy.
Shyǵys Qazaqstan oblysynda baǵa – 45 000-132 000 teńge aralyǵynda. Almaty oblysynda 50 000 teńgeden bastalyp, 350 000 teńgege jetti. Bul elimiz boıynsha rekordtyq kórsetkish. Lager tabıǵaty ásem jerde ornalasqan ári til úıretýge baǵyttalǵan.
Qaı óńirde qymbat
Túrkistan oblysynda joldama quny – 60 000-100 000 teńge. Jambyl oblysynda orta eseppen – 63 000 teńge. Aqtóbede lager joldamasy orta eseppen – 70 000 teńge. Munda qala syrtynda memlekettik lager joq, bul qyzmetti tek jeke kásipkerler kórsetedi. Al munaıshylardyń balalary lagerde tegin demalady. Ózge óńirlerdegi iri kompanııalar da balalardyń jazǵy demalysyn tegin uıymdastyryp berip júr.
Ekinshi orynda – Abaı oblysy. Mundaǵy joldama quny – 75 000 – 100 000 teńge. Eń qymbaty – Mańǵystaý oblysyndaǵy joldama. Mundaǵy baǵa – 150 000 – 180 000 teńge.
Ulytaý oblysynyń jaıy bólek
Oblysta jeke lager joq. Alaıda Qazaqmys balalarǵa ózge óńirlerdegi lagerlerdiń joldamasyn alyp beredi.
Buǵan deıin mektep bitirý keshine keter shyǵyn týraly jazǵan edik.