Qazaqstanda balabaqsha men kolledjderde medıatsııa qyzmeti engiziledi
ASTANA. KAZINFORM – QR Oqý-aǵartý mınıstrligi barlyq mektepke deıingi, sondaı-aq tehnıkalyq jáne kásiptik bilim berý uıymdarynda medıatsııa júıesin iske qosýda. Bul bastama balalar, stýdentter, pedagogtar men ata-analar arasyndaǵy túsinispeýshilikterdi beıbit jolmen sheshýge múmkindik beredi. Sonymen qatar, jańa qurylym býllıngtiń aldyn alýǵa baǵyttalady. Bul týraly vedomstvonyń baspasóz qyzmeti málim etti.
— Balabaqshalarda atalǵan qurylym tárbıeshiler men ata-analarǵa búldirshinder arasyndaǵy kelispeýshilikterdi retteýge kómektesedi. Sondaı-aq, balalardyń boıynda kishkentaı kezinen bastap til tabysý, bólise bilý, ortaq mámilege kelý jáne janjaldardan beıbit jolmen shyǵý daǵdylaryn qalyptastyrady, — delingen habarlamada.
Kolledjderde bul tetik stýdentter arasyndaǵy arazdyqty sheshýge, qorlyq kórsetý jaǵdaılaryna jol bermeýge jáne bilim alýshylar arasyndaǵy qaqtyǵystardy azaıtýǵa septigin tıgizedi.
Jumys barysy birkelki bolýy úshin Y. Altynsarın atyndaǵy Ulttyq bilim akademııasy ázirlegen ádistemelik usynymdar men erejeler negizge alynady. Onda daýlardy sheshý men agressııanyń aldyn alýdyń naqty joldary kórsetilgen.
— Medıatsııa tobynyń quramyna dırektordyń tárbıe isi jónindegi orynbasary, pedagog-psıhologtar, áleýmettik mamandar, ata-analar, qoǵamdyq uıym ókilderi, sondaı-aq jas ereksheligine qaraı bilim alýshylardyń ózderi de kiredi, — dep habarlady vedomstvodan.
Aıta keteıik, mundaı tájirıbe buǵan deıin «100 medıatıvtik mektep» jobasy aıasynda engizilgen bolatyn. Ol daý-damaılardyń aldyn alýda jáne oqýshylar arasyndaǵy jaǵymdy psıhologııalyq ahýaldy qalyptastyrýda óz tıimdiligin dáleldedi.
Eske sala keteıik, buǵan deıin «Bolashaq» túleginiń isi medıatsııa tártibimen qaralyp jatqanyn jazǵan edik.