Qazaqstanda baǵa belgileýdiń jańa erejesi engizildi
ASTANA. KAZINFORM — Qazaqstan Respýblıkasy Saýda jáne ıntegratsııa mınıstriniń buıryǵymen saýda salasyndaǵy jańa erejeler engizildi. Endi ár taýar úshin bir ǵana baǵa kórsetiledi, al áleýmettik mańyzy bar azyq-túlik taýarlarynyń saýda ústemesine jasyryn tólemder qosýǵa tyıym salynady. Bul týraly Astana qalasynyń ákimdigi jazdy.
Baǵa belgileýdiń jańa erejesi týraly Astana qalasynyń Saýda jáne tutynýshylardyń quqyqtaryn qorǵaý departamentiniń basshysy Ǵalymjan Іlııasov elordanyń Kommýnıkatsııalar qyzmetinde ótken brıfıngte aıtty.
Spıkerdiń aıtýynsha 2025 jylǵy 11 qazannan bastap Qazaqstan Respýblıkasynda 2015 jylǵy 27 naýryzdaǵy № 264 buıryqpen bekitilgen Іshki saýda qaǵıdalaryna engizilgen ózgerister men tolyqtyrýlar kúshine endi. Tıisti túzetýler Qazaqstan Respýblıkasy Saýda jáne ıntegratsııa mınıstriniń 2025 jylǵy 26 qyrkúıektegi № 276-NQ buıryǵymen engizildi.
— Bul ózgerister baǵa belgileýdiń ashyqtyǵyn arttyrýǵa, tutynýshylardyń quqyqtaryn qorǵaýǵa, áleýmettik mańyzy bar azyq-túlik taýarlary (ÁMAT) baǵasynyń ósýin tejeýge, sondaı-aq otandyq taýar óndirýshilerdi qoldaýǵa baǵyttalǵan, — delingen habarlamada.
Baǵa belgileýdiń ashyqtyǵyn qamtamasyz etý maqsatynda qaǵıdalardyń 2-tarmaǵy 28-1) jáne 69-1) tarmaqshalarymen tolyqtyrylyp, «áleýmettik mańyzy bar azyq-túlik taýarlarynyń kóterme jetkizýshisi» jáne «áleýmettik mańyzy bar azyq-túlik taýarlarynyń óndirýshisi» uǵymdary engizildi.
Naqty anyqtamalardyń belgilenýi jetkizý tizbegindegi qatysýshylardy aıqyndaýǵa jáne ónimsiz deldaldardy anyqtaýǵa múmkindik beredi. Bul negizsiz saýda ústemelerin azaıtyp, halyq úshin áleýmettik mańyzy bar azyq-túlik taýarlarynyń túpkilikti baǵasyn tómendetýge yqpal etedi.
— Erejeniń 8-tarmaǵy jańa redaktsııada baıandalyp, baǵa japsyrmalaryn rásimdeýge biryńǵaı talaptar belgilendi. Endi ishki saýda sýbektileri, onyń ishinde elektrondyq kommertsııa qatysýshylary bir taýarǵa bir ǵana baǵa kórsetýge mindetti, — dep jazdy ákimdikten.
Erekshelik aktsııadaǵy, jeńildigi bar jáne bólip tóleý arqyly satylatyn taýarlarǵa qatysty.
Bólip tóleý kezinde saýda nysandary taýardyń baǵasyn bólek kórsetýi tıis: bir rettik tólem kezindegi baǵa jáne óz qarajaty esebinen bólip tóleý kezindegi baǵa.
Osyǵan uqsas talap qaǵıdalardyń 194-tarmaǵynda elektrondyq saýdaǵa da engizildi. Bul norma tutynýshylardyń aqparattandyrylýyn arttyryp, taýardy bólip tóleý arqyly satyp alý kezinde artyq tólemniń bar-joǵyn aldyn ala bilýge múmkindik beredi.
Erejeniń burynǵy redaktsııasynda 49-tarmaqta «saýda jelisi» uǵymy qoldanylyp, bul talaptyń keıbir iri, biraq saýda jelisine kirmeıtin nysandarǵa qoldanylýyna shekteý qoıylǵan edi.
Quqyqtyq naqtylyqty qamtamasyz etý úshin «saýda jelileri men saýda bazarlary arqyly» degen tujyrym «Qazaqstan Respýblıkasynyń Saýda qyzmetin retteý týraly» Zańynyń 10-babynyń 2-tarmaǵyna sáıkes 1, 2, 3 jáne 4 sanattaǵy saýda obektileri» dep aýystyryldy.
Bul ózgeris saýda alańy 100 sharshy metrden asatyn barlyq statsıonarlyq saýda obektilerine, olardyń uıymdastyrýshylyq-quqyqtyq nysanyna qaramastan, talaptardyń birkelki qoldanylýyn qamtamasyz etedi.
Otandyq óndirýshilerdi damytý jáne qoldaý maqsatynda Qaǵıdalardyń 49 jáne 50-tarmaqtaryna saýda obektileriniń otandyq óndiristegi azyq-túlik emes taýarlardy ornalastyrý jónindegi mindetteri engizildi.
Sondaı-aq, 5-paragraftaǵy normadan «iri» degen sózdiń alynyp tastalýy Qaǵıdalardyń qoldanylý aıasyn keńeıtip, barlyq saýda obektileri úshin teń jaǵdaı qalyptastyrady jáne jalǵa berý men servıstik qatynastardyń ashyqtyǵyn arttyrady.
Buǵan deıin Qaǵıdalardyń 229-tarmaǵy tasymaldaý, saqtaý, ımport jáne tabıǵı kemý shyǵyndaryn saýda ústemesine qosýǵa múmkindik berip, belgilengen shekti mólsherdiń is júzinde saqtalmaýyna ákep soǵatyn.
— Jańa redaktsııaǵa sáıkes, áleýmettik mańyzy bar azyq-túlik taýarlaryn satý kezinde saýda ústemesine ishki saýda sýbektisine tólenetin syıaqylardy, jasyryn komıssııalar men alymdardy qosýǵa tyıym salynady. Sondaı-aq, kredıtterdi, qaryzdardy jáne saqtandyrýdy rásimdeýge baılanysty shyǵyndardy engizýge jol berilmeıdi, — delingen habarlamada.
Qosymsha engizilgen 229-2-tarmaqta ÁMAT satyp alý kezinde ishki saýda sýbektisine syıaqy tóleýge tikeleı tyıym salynǵan.
Qaǵıdalar 229-1-tarmaqpen tolyqtyrylyp, áleýmettik mańyzy bar azyq-túlik taýarlaryn ótkizý kezinde mindetti túrde qosa beriletin qujattar tizbesi bekitildi. Olarǵa jetkizý sharttary, taýarǵa ilespe qujattar, shot-faktýralar, sondaı-aq óndirýshiniń nemese jetkizýshiniń bosatý ne satyp alý baǵasyn rastaıtyn qujattar jatady.
— Qajet bolǵan jaǵdaıda saýda ústemesine engizilgen shyǵyndardy rastaıtyn qujattar, sáıkestik sertıfıkattary nemese sáıkestik týraly deklaratsııalar usynylýy tıis. Bul norma baǵa belgileý talaptarynyń saqtalýyn baqylaýdy kúsheıtýge, negizsiz baǵa ósiminiń aldyn alýǵa, sondaı-aq taýarlardyń zańdylyǵyn, sapasy men qaýipsizdigin rastaýǵa múmkindik beredi. Osyǵan baılanysty elorda kásipkerleri men ishki saýda salasyndaǵy barlyq sýbektilerdi kúshine engen ózgeristerdi eskerip, óz qyzmetinde qoldanystaǵy zańnama talaptaryn qatań saqtaýǵa shaqyramyz, — deıdi Ǵalymjan Іlııasov.
Aıta keteıik, azyq-túliktiń 11 túrine baǵanyń eń tómengi deńgeıi engizilmek.