Qazaqstanda Ázerbaıjan joǵary oqý oryndarynyń kórmesi bastaldy
ASTANA. KAZINFORM — Ál-Farabı atyndaǵy Qazaq ulttyq ýnıversıtetiniń Farabi Hub ınnovatsııalyq ortalyǵynda «Study in Azerbaijan» atty Ázerbaıjanjoǵary oqý oryndarynyń halyqaralyq kórmesi saltanatty túrde ashyldy, dep habarlaıdy Ǵylym jáne joǵary bilim mınıstrliginiń baspasóz qyzmeti.
Eki kúnge josparlanǵan shara eki el arasyndaǵy bilim men ǵylym salasyndaǵy strategııalyq áriptestikti nyǵaıtýdy kózdeıdi.
Kórmeniń ashylý rásimine QR Ǵylym jáne joǵary bilim mınıstri Saıasat Nurbek pen ÁzerbaıjanRespýblıkasynyń Ǵylym jáne bilim mınıstri Emın Amrýllaev, sondaı-aq eki memlekettiń jetekshi JOO rektorlary men bilim salasynyń sarapshylary qatysty.
Halyqaralyq sharaǵa Ázerbaıjannyń 25-ke jýyq úzdik ýnıversıteti qatysyp jatyr. Talapkerler men stýdentter bilim berý baǵdarlamalarmen, akademııalyq múmkindiktermen jáne ǵylymı jetistiktermen tanysa alady. Kórme aıasynda granttar, akademııalyq utqyrlyq, qosdıplomdy bilim berý jáne oqýǵa qabyldaý sharttary boıynsha egjeı-tegjeıli keńester beriledi.
Jıyn barysynda mınıstr Saıasat Nurbek bul bastamanyń ekijaqty baılanystyń logıkalyq jalǵasy ekenin atap ótti.
— Ótken jyly Ázerbaıjanda uıymdastyrylǵan «Study in Kazakhstan» kórmesine 2500-den astam talapkerler qatysyp, úlken qyzyǵýshylyq tanytty. Sol sapar barysynda 80-ge jýyq mańyzdy kelisimge qol jetkizgen bolatynbyz. Búgingi shara — jemisti yntymaqtastyqtyń nátıjesi. Ázerbaıjan úkimeti qazaqstandyq talapkerlerge arnaıy granttar usynyp otyr. Bul bizdiń jastarymyz úshin halyqaralyq deńgeıde tájirıbe jınaqtap, bilimin shyńdaýǵa ashylǵan úlken múmkindik, — dedi mınıstr.
Óz kezeginde Emın Amrýllaev bilim salasyndaǵy ıntegratsııanyń mańyzyna toqtaldy.
— Qazaqstan men Ázerbaıjan — tarıhy men mádenıeti tamyrlas memleketter. Bilim salasyndaǵy áriptestik osy rýhanı jaqyndyqty nyǵaıta túsedi. Biz qazaqstandyq stýdentterge sapaly bilim men zamanaýı múmkindikter usynýǵa daıynbyz. Mundaı alańdar jastarǵa bolashaq mamandyǵyn durys tańdap, halyqaralyq deńgeıde básekege qabiletti bolýǵa kómektesedi, — dedi E.Amrýllaev.
Aıta keteıik, kórme 7-8 sáýir kúnderi QazUÝ-dyń Farabi Hub ortalyǵynda jalǵasady. Kez kelgen talapker Ázerbaıjan ýnıversıtetterine oqýǵa túsý sharttary men granttyq baǵdarlamalar týraly tolyq málimetti tikeleı ókilderden ala alady.
Budan buryn Bakýde Qazaqstannyń Ázerbaıjandaǵy Elshiligi uıymdastyrǵan Naýryz merekesi ótkenin jazǵan edik.