Qazaqstanda áıelder kóp pe, erler kóp pe

Qazaqstandaǵy áıelder sany erler sanynan burynǵydaı basym, dep habarlaıdy Kazinform.

2021 jylǵy sanaq qorytyndysy boıynsha olardyń sany jarty mıllıonǵa (536,3 myń adamǵa) artyq boldy. Paıyzben aıtsaq, erler úlesi – 48,6% (9 324 840 adam), áıelderdiki – 51,4% (9 861 175 adam). Aldyńǵy sanaqpen salystyrǵanda erler sany 1,6 mln, áıelder sany 1,5 mln artty, Qazaqstanda 1000 áıelge 946 erden keledi.

"Demografııa erekshelikterine baılanysty 36 jasqa deıingi er adamdar sany áıelderge qaraǵanda kóp, sodan keıin ǵana olardyń sany araqatynasqa salǵanda azaıa bastaıdy (36 jastan asqan áıelder sany 736 myń adamǵa kóp). Bul rette erler men áıelderdiń araqatynasy tek eki óńirde – Qyzylorda jáne Túrkistan oblystarynda kóp, onda 1000 áıelge sáıkesinshe 1006 jáne 1027 er adamnan keledi.

Aldyńǵy sanaqqa qaraǵanda 15-19 jas jáne 20-24 jas aralyǵyndaǵy áıelder men erlerdiń sany azaıǵanyna nazar aýdarýǵa bolady. Bul 2009 jylǵy halyq sanaǵy kezinde 20-24 jas aralyǵyndaǵy topta týýdyń eń joǵary kezeńinde – 1980 jyldardyń ekinshi jartysynda týylǵan urpaqtyń bolýymen baılanysty", - dep jazdy Ulttyq statıstıka bıýrosynan.

Al 2021 jyly bul jas tobyn 1990-shy jyldardyń aıaǵy men 2000-shy jyldardyń basynda dúnıege kelgen týý kórsetkishi tómen bolǵan urpaq almastyrdy. Sol sııaqty 15-19 jas sanaty boıynsha 2002-2006 jyly týǵan urpaq 1990-shy jyldardyń birinshi jartysyndaǵy urpaqqa qaraǵanda az.

2009 jylǵy sanaqpen salystyrǵanda 55-59, 60-64 jáne 65-69 jastaǵy er adamdar sany sáıkesinshe 50,2%, 117% jáne 69,5% aıtarlyqtaı ósti. Osy jastaǵy áıelder sany da 2009-ǵa qaraǵanda sáıkesinshe 38%, 105,9% jáne 58,3% ósken. Atalǵan jas tobyndaǵy halyqtyń ósýi ortasha ómir súrý uzaqtyǵynyń artýymen, ómir súrý jaǵdaılarynyń jaqsarýymen baılanysty.